Almaty oblysynyń 9 myńnan astam kásipkerine salyqtyq raqymshylyq jasalady
TALDYQORǴAN.QazAqparat- Almaty oblysynda bıznes ókilderinen 1,6 mlrd teńgeden astam somadaǵy ósimpul men aıyppul esepten shyǵarylady.
Bul týraly Almaty oblysy boıynsha memlekettik kirister departamentiniń ókilderi Kásipkerler palatasynda ótken «Salyq qyzmetkeriniń saǵaty» jobasynyń aıasynda atap ótti, dep habarlaıdy QazAqparat tilshisi.
Memlekettik kirister departamentiniń túsindirý jumystary basqarmasynyń bas mamany Shuǵyla Qalıbekovanyń aıtýynsha, salyqtyq raqymshylyq naýqany shaǵyn jáne orta bıznes ókilderi arasynda júrgiziledi.
«2018 jyldyń 1 qazanyndaǵy negizgi boryshty 2019 jyldyń 31 jeltoqsanyna deıin ótegen kásipkerlerge ósimaqylar men aıyppuldar esepten shyǵarylady. Bul rette aıyppul somasy 2018 jylǵy 1 qazandaǵy jaǵdaı boıynsha, al ósimpul somasy - negizgi boryshty tóleý kúnine deıin eseptelgen somasy esepten shyǵarylady. Jalpy oblys boıynsha 9,6 myńnan astam kásipkerge salyqtyq raqymshylyq jasaý josparlanǵan. Aldyn ala málimetter boıynsha, 1,5 mlrd teńge kóleminde ósimpul men 102,8 mln teńge kólemindegi aıyppuldar alynady», - dedi Shuǵyla Qalıbekova.
Eske salsaq, Memleket basshysy Joldaýynda shaǵyn jáne orta bıznes sýbektilerine 2018 jyldyń 1 qańtarynan bastap salyqtyq raqymshylyq engizý týraly tapsyrma bergen bolatyn.
«Raqymshylyq kásipkerlik qyzmetine oń áser beretini sózsiz. Bul - memleket tarapynan kórsetilgen taǵy bir nátıjeli qoldaý. Óz kezeginde ol jobanyń damýyna, jańa jumys oryndarynyń paıda bolýyna yqpalyn tıgizedi», - dedi Almaty oblysy Kásipkerler palatasynyń sarapshysy Sanat Túsipov.
«Salyq qyzmetkeri saǵatynyń» aıasynda býhgalterler sarapshylarǵa jeke kásipkerlikti ýaqytsha toqtatý men jabý, múliktik tabys salyǵyn tóleý, saýda salasynda elektrondy shot-faktýralardy shyǵarý jáne t.b. máseleler boıynsha keńester aldy. Memlekettik kirister departamentiniń bas mamany Áýelhan Álisherov baqylaý-kassa mashınalaryn qoldaný, biryńǵaı jıyntyq tólemin engizý boıynsha máselelerdi keńinen túsindirip ótti.
Aıta keteıik, ár aıdyń ekinshi sársenbisinde Kásipkerler palatasynda memlekettik kirister departamenti mamandarynyń qatysýymen «Salyq qyzmetkeriniń saǵaty» ótedi. Onda býhgalterler men kásipkerlerdi salyq máseleleri boıynsha qabyldaý júrgiziledi.
