Almaty oblysynyń 50 memqyzmetkeri tártiptik jaýapkershilikke tartyldy
TALDYQORǴAN. QazAqparat - Ádep jónindegi keńes óz qyzmeti barysynda zańdylyq, jan-jaqtylyq pen ádildik, ádeptilik, qoǵamdyq pikir men jarııalylyqty eskerý, sybaılas jemqorlyqtyń aldyn alý sharalaryn qoldaný qaǵıdattaryn basshylyqqa alady.
Almaty oblysyndaǵy Ádep jónindegi keńes te osy mindetter aıasynda jumys istep keledi.
Aǵymdaǵy jyldyń 9 aıynda Ádep jónindegi keńestiń 9 otyrysy ótkizilip, onda 121 másele qaralǵan. Onyń ishindegi basym kópshiligi, ıaǵnı 104-i tártiptik is.
Ádep jónindegi keńestiń usynysy boıynsha tártiptik jaýapkershilikke 70 memlekettik qyzmetshi tartylsa, onyń ishindegi 50-i - Ádep kodeksin buzǵany úshin, al 20-sy memlekettik qyzmetke kir keltiretin teris áreketi úshin jazalandy. Bul týraly Almaty oblysynyń óńirlik kommýnıkatsııalar qyzmetinde ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń memlekettik qyzmet salasyndaǵy baqylaý basqarmasynyń basshysy Ulan Qaljanov aıtyp ótti.
Sonymen qatar, atalǵan departament ókilderi bıylǵy 9 aı ishinde memlekettik qyzmet salasyndaǵy zańnamanyń saqtalýy men memlekettik qyzmetshilerdiń qyzmettik ádepti saqtaýy boıynsha 42 tekseris júrgizgen. Nátıjesinde 492 buzýshylyq anyqtalyp, memlekettik organdarǵa zań buzýshylyqty joıý týraly 19 usynys engizilgen. Sol usynystardy qaraý barysynda 20 memlekettik qyzmetshi ár túrli tártiptik jaýapkershilikke tartylǵan.
