Almaty oblysynyń 4 aýdanynda bilim salasynyń jumysyna shaǵymdanýshylar kóp
Sharaǵa Almaty oblysy boıynsha sybaılas jemqorlyqpen kúres departamentiniń basshysy Serik Orymbetov, oblys ákiminiń orynbasary Batyrjan Baıjumanov, bilim basqarmasynyń basshylary jáne mektep dırektorlary qatysty.
Aımaqta sybaılas jemqorlyq táýekelderiniń kartasyna sáıkes, bilim berý salasy jemqorlyqqa beıim. Kadr máselesin sheshý, memlekettik baǵdarlamalardyń qarjysyn jumsaý men memlekettik satyp alý barysynda quqyqbuzýshylyqtar beleń alyp jatyr.
«Bilim berý mekemelerinde «ata-analar komıtetteri» jemqorlyqqa aparar birden-bir jol. Sebebi olardyń qyzmeti rettelmegen. Synyptyń uıymdastyrýshylyq máseleleri úshin synyp jetekshisi bar. Olar sol úshin jalaqy alady», – deıdi Serik Orymbetov.
Departament basshysynyń aıtýynsha, turmystyq sybaılas jemqorlyqqa qarsy kúrestegi bir qural 1424 call-ortalyǵy. Ortalyq arqyly bıyl 42 turǵynnan bilim berý salasyna qatysty shaǵymdar kelip tústi. Al sońǵy eki aptada 13-ten astam aryz tirkelgen. Shaǵymdardyń kóp bóligi Eńbekshiqazaq, Qarasaı, Іle jáne Talǵar aýdandaryna qatysty boldy.
Sondaı-aq kásipkerlik qyzmetpen aınalysýǵa tyıym salynǵan 23 mektep dırektory kásipkerlik qyzmetpen aınalysqany úshin ákimshilik jaýapqa tartyldy. Bilim berý mekemesi basshylarynyń barlyǵyna 200 AEK ıaǵnı, 612 600 teńge kóleminde aıyppul salyndy.
Aıta ketý kerek, bıyl óńirde jemqorlyq qylmysy boıynsha 100 fakti anyqtaldy. Para alý deregimen 72 qylmys tirkeldi. 68 adam jemqorlyq qylmystaryn jasaǵany úshin sottaldy.