Almaty oblysynyń 3 turǵyny páter úshin adam óltirdi

ALMATY OBLYSY. QazAqparat – Almaty oblysynyń úsh turǵyny 48 jastaǵy er adamdy óltirip, onyń páterin ıelenbekshi bolǵan, dep habarlaıdy QazAqparat óńirdiń PD baspasóz qyzmetine silteme jasap.

25 naýryzda Eńbekshiqazaq aýdany Qarakemer aýylyna jaqyn mańda jergilikti turǵyndar belgisiz adamnyń órtengen máıitin tapqan.

Sot-medıtsınalyq saraptama boıynsha, er adamnyń pyshaqtalyp, kóp qan joǵaltqany anyqtalǵan. Tártip saqshylary óltirilgen adamnyń jeke-basyn anyqtady – ol naýryz aıynyń ortasynan bastap iz-túzsiz joǵalǵandar tizimine engen 48 jastaǵy Almaty turǵyny bolyp shyqty. Almaty men Almaty oblysy polıtseıleriniń birlesken kúshimen úsh kúdikti ustaldy, olardyń biri áıel adam.

«Úsheýi de Eńbekshiqazaq aýdanynyń turǵyny. Olardyń eń úlkeni 33-te jáne eń kishisi 23 jasta. Kúdiktiler bergen túsiniginde zardap shegýshini Almatydaǵy páterin ıelený úshin óltirgenin jazǵan. Er adam jalǵyz ózi turyp, ishimdik ishetin bolǵan. Kúdiktiler onyń osy áreketin paıdalanǵan. Ony Almaty aýmaǵynda óltirgen. Keıin onyń máıitin jalǵa alǵan kólikpen Eńbekshiqazaq aýdanyna alyp baryp, Qarakemer aýylyna jaqyn jerde órtemek bolǵan», - dedi aýdandyq polıtsııa bastyǵy Jaqsylyq Altynbaev.

Kúdiktiler qamaýǵa alyndy. Tergeý júrip jatyr.