Almaty oblysyndaǵy jarylys: kináli bes jylǵa deıin sottalýy múmkin
TALDYQORǴAN. QazAqparat - Almaty oblysynyń Qarasaı aýdanyna qarasty Raıymbek aýylyndaǵy gazbetondy blok shyǵaratyn tsehta bolǵan jarylys boıynsha qylmystyq is qozǵaldy, dep habarlaıdy QazAqparat tilshisi.
«Osy fakti boıynsha QR QK 156 baby «Eńbekti qorǵaý qaǵıdalaryn buzý» 3-bóligi boıynsha is qozǵalyp, tergeý júrip jatyr. Atalǵan fakti Almaty oblysyndaǵy Polıtsııa departamenti basshylyǵynyń qatań baqylaýynda», - dedi Almaty oblystyq Polıtsııa departamentindegi baspasóz qyzmetiniń jetekshisi Sergeı Neznaev.
Atalǵan qylmystyq kodekstiń osy babyna sáıkes, kináli adam belgili bir laýazymdy atqarý quqyǵynan 3 jylǵa deıin aıyrylyp, bes jylǵa deıin bas bostandyǵynan shekteledi. Nemese dál osy merzimge bas bostandyǵynan aıyrylady.
Eske salsaq, 31 tamyz kúni Qarasaı aýdanynyń Raıymbek aýylynda gazbetondy blok shyǵaratyn tsehta jarylys boldy. Saldarynan tseh ishinara buzylyp, tútin shyǵatyn qubyrdyń bir bóligi jeke turǵyn úı sektorynyń aýmaǵyna ushyp túsken. Jarylys ornynda 1961 jylǵy er adamnyń denesi tabyldy. Aýdandyq aýrýhanaǵa ártúrli jaraqatpen eki adam jetkizilgen edi. Aýrýhanaǵa jetkizilgen 1981 jylǵy naýqas jansaqtaý bóliminde 31 tamyz kúni keshki saǵat 20:20 da qaıtys boldy. Almaty oblystyq densaýlyq saqtaý basqarmasynyń baspasóz qyzmetiniń hatshysy Láılim Áýbákirovanyń sózinshe, aýrýhanada jatqan 1984 jylǵy azamattyń da jaǵdaıy aýyr. Ol travmatologııa bóliminen jansaqtaý bólimine aýystyrylǵan.
