Almaty oblysyndaǵy jańa zaýyt ónimi 20-ǵa jýyq elge eksporttalmaq
Kombınatqa maman daıarlaýǵa erekshe mán berilip, Bastóbedegi kolledjde qazirdiń ózinde elektromonter men elektr gaz dánekerleýshi kásipke 48 maman arnaıy oqytylyp jatyr. Dýaldy oqytý aıasynda kombınattyń bazasynda tehnık-mehanıkter men kópirli kran operatorlaryn qaıta daıarlaýǵa múmkindik jasalady.
«Búgin biz birshama jyl toqtap turǵan metallýrgııa kombınatynyń qalpyna keltirilip, qaıta iske qosylǵanyna kýá bolyp otyrmyz. Jańa ınvestorlar kombınattyń ekinshi tynysyn ashyp, qysqa merzim ishinde jańǵyrtýdan ótkizdi. Kombınatqa qajetti mamandar osy Qaratal aýdanynyń ózinde daıyndalady. Jergilikti mamandar daıarlaý isi bastalyp ta ketti. Osy sharalardyń barlyǵy Prezıdenttiń halyqtyń ál-aýqatyn arttyrý, turaqty jumys oryndaryn ashý týraly tapsyrmasyn oryndaý maqsatynda júzege asyrylyp otyr, - dedi Almaty oblysynyń ákimi Qanat Bozymbaev.
Zaýyt Qaratal aýdanynyń Jylybulaq aýylyna taıaý jerdegi «Sarykól» ken ornynan alynatyn jelilik kvarts túrindegi shıkizatpen ózin qamtamasyz etedi. Jalpy kremnıı álemde metallýrgııa salasynda, sol sııaqty joǵary dáldiktegi elektr qurylǵylary óndirisinde paıdalanylatyndyqtan, úlken suranysqa ıe. Bul kombınatta jylyna 6 myń tonna metallýrgııa óndiriledi. Qazaqstandyq mazmunnyń úlesi 80% bolatyn daıyn ónimder 20 shaqty elge eksporttalmaq.
Almaty oblysy ákiminiń baspasóz qyzmetiniń málimetinshe, osy jobany iske asyrýǵa 3,9 mlrd teńge ınvestıtsııa tartylyp otyr. Kásiporynda 200 adam jumys isteıtin bolady.
