Almaty oblysyndaǵy ystyq sýǵa kelýshiler sany artýda
TALDYQORǴAN. QazAqparat - Almaty oblysynda jer asty termaldy sýlary maýsymdyq týrızmdi damytýdyń jańa múmkindigi dep habarlaıdy QazAqparat tilshisi.
Bir ǵana Uıǵyr aýdanynda 40-tan astam demalys orny halyqqa qyzmet kórsetýde. Bul jerde jer astynan shyqqan mıneraldy sýda qońyr kúzden jaz shyqqansha shomylýǵa bolady. Shonjynyń ystyq sýy Saryaǵash shıpajaıynyń sýynyń quramyna uqsas. Aǵzaǵa da, bulshyq et pen sińirdi qyzdyrýǵa da paıdaly. Demalys oryndaryna halyq mereke jáne demalys kúnderi óte kóp aǵylady. Keıde múldem oryn tabylmaı qalatyn kúnder bolady deıdi "Qaradala" saýyqtyrý kesheniniń ákimshisi Venera Islamova. Al osy ystyq sýdyń yrysyn kórip, tynyqqandardyń basym bóligi shetel asyp, qarjyny syrtqa shashqansha óz elimizde demalyp, memleketimizdiń ekonomıkasyn nyǵaıtqan áldeqaıda artyq ekenin aıtady. Sondaı-aq mundaǵy demalys oryndary jergilikti turǵyndardy turaqty jumyspen qamtyp keledi. Aldaǵy ýaqytta Uıǵyr aýdanynda taǵy da birneshe iri qonaq úı men demalys oryndary qoldanysqa beriledi dep kútilýde.
