Almaty oblysyndaǵy túrmeni tintý kezinde 31 uıaly telefon men 17 pyshaq tabyldy
TALDYQORǴAN. QazAqparat - Almaty oblysy boıynsha qylmystyq-atqarý júıesi departamentiniń LA-155/8 mekemesinde (joǵarǵy qaýipsizdik) tintý jumystary júrgizildi, - dep habarlaıdy QazAqparat tilshisi.
Shara barysynda 31 birlik uıaly telefon (qarapaıym-16, smartfondar -15), 10 zarıadtaǵyshtar quraldar, 6 sım-karta, 3 dana qulaqqap, 3 dana MP3 oınatqysh, 2 oıyn karta, 30 metr elektr sym jáne 17 dana qoldan jasalǵan tesýge jáne kesýge arnalǵan quraldar (pyshaq, qaıraýysh jáne t.b.) taýyp, tyıym salynǵan zattar tárkilendi.
«Qyzmetkerler tyıym salǵan zattardy sottalýshylarǵa olardyń týǵan-týystary men tanystary jetkizedi, keıbiri tyıym salynǵan zattardy mekemeniń syrtqy qorshaýynan laqtyrady. Bul baǵytta aldyn alý jumystary júrgizilip turatyndyǵyna qaramastan zańsyz áreketter bolyp turady. Osyǵan baılanysty mekeme ákimshiligimen únemi tintý jumystary júrgiziledi. Týystaryn zańbuzýshylyqqa ıtermelegen sottalǵandar mindetti túrde tártiptik jazaǵa tartylatynyń, al tyıym salynǵan zattardy mekemege ótkizýshiler jazasyz qalmaıtynyń eskertemiz», - dedi óńirlik Qylmystyq atqarý júıesi Departamenti bastyǵynyń orynbasary Qanat Ashov.
Vedomstvo ókilderi tintý jumystary vıdeoǵa túsirilgenin jetkizdi.
«Mekeme ákimshiligi men QAJ qyzmetkerleri tarapynan zań buzýshylyqtarǵa jol berilmegen. Sottalǵandar arasynan tintý jumystaryna baılanysty aryz-shaǵymdar túsken joq. Osy is-sharanyń zańdylyǵyn jáne sottalǵandardyń quqyqtarynyń saqtalýyn qamtamasyz etý úshin barlyq áreketter vıdeoǵa túsirildi»- dedi Almaty oblysy boıynsha mekemelerde kylmystyq jazalardyń oryndalý zańdylyǵyn kadaǵalaý jónindegi mamandandyrylǵan prokýror Azamat Abdýldaev.
Tekserý sharasy qadaǵalaý jónindegi mamandandyrylǵan prokýratýra ókilderiniń, № 3660 áskerı bóliminiń jeke quramynyń, mekeme qyzmetkerleriniń jáne QAJ Departamentine baǵynysty mekemelerdiń qyzmetkerleriniń qatysýymen júrgizildi.
«Atalǵan is-shara sanıtarlyq-epıdemıologııalyq normalarǵa sáıkes ótkizildi»,- delingen vedomstvonyń habarlamasynda.
