Almaty oblysyndaǵy túrmede úsh adam óz denelerine jaraqat saldy
ASTANA. QazAqparat - Almaty oblysyndaǵy LA-155/14 túzetý mekemesine júrgizilgen tintý sharalary barysynda úsh sottalǵan adam óz denelerine ádeıi zaqym keltirdi, dep habarlaıdy «QazAqparat» Almaty oblystyq QAJ departamentine silteme jasap.
«Adam óltirý, zorlaý qylmysy boıynsha 12 jylǵa sottalǵan olardyń biri basyn qabyrǵaǵa soqsa, qaraqshylyq úshin 6 jylǵa sottalǵan ekinshisi basymen terezeni syndyryp jaraqat aldy, urlyq úshin 5 jyl jazaǵa kesilgen úshinshi adam óz-óziniń qolyn kesip jiberdi. Bulardyń úsheýi de mekeme tártibin udaıy buzatyn sottalǵandar», - dep habarlaıdy QAJD.
Olardyń qoldaryna kisen salynyp, baqylaýshy organ ókilderiniń kóz aldynda akt toltyryldy.
Oryn alǵan jaǵdaıǵa baılanysty materıaldar Aqparattardy tirkeý kitabyna engizilip, protsessýaldyq sheshimder qabyldaý maqsatynda Qapshaǵaıdaǵy qalalyq ishki ister bólimine jiberildi.
Osyǵan deıin habarlanǵandaı, vedomstvolyq normatıvtik quqyqtyq aktilerge sáıkes respýblıkanyń qylmystyq-atqarý júıesiniń barlyq mekemelerinde tintý jumystary múlikti tolyq túgendeý arqyly júzege asyrylýda, sharanyń negizgi maqsaty - túzetý mekemelerindegi tártipti kúsheıtip, tyıym salynǵan zattardy anyqtaý jáne joıý.
