Almaty oblysyndaǵy sheneýnikterdiń tóbelesi: Qylmystyq is qozǵaldy
TALDYQORǴAN. QazAqparat – Almaty oblysyndaǵy sheneýnikterdiń tóbelesine qatysty tyń derekter jarııalandy, dep habarlaıdy QazAqparat tilshisi.
Almaty oblysy Jambyl aýdan ákiminiń apparat basshysy A.Nurpeıisovtiń resmı taratqan aqparatyna qaraǵanda, shýly oqıǵaǵa qatysty qylmystyq is qozǵalyp, tergeý sharalary júrgizilýde.
«25.12.2019 jyly saǵat 00: 30-da Uzynaǵash aýylyndaǵy «Mıras» saýda ortalyǵynda ornalasqan «Belye rozy» meıramhanasynda aýdandyq mádenıet úıiniń zańgeri I. Beısebaev pen ákimniń orynbasary A. Ábdibaev, aýdandyq sáýlet jáne qala qurylysy bóliminiń bas mamany Q. Úsenbaev arasynda tóbeles oryn alǵan. Tóbeles barysynda A. Abdıev pen Q. Úsenbaev birlese otyryp I. Beısebaevqa shabýyl jasady. Aýdan ákimdiginde osy tekserý boıynsha jumys komıssııa toby quryldy. Tóbeleske qatysýshylar A. Abdıbaev pen Q. Úsenbaevtan oryn alǵan oqıǵa týraly túsinikteme alyndy. Osyǵan baılanysty, I. Beısebaev aýdandyq aýrýhanada, túsinikteme alýǵa múmkin bolmady. Tekserý jumystyń nátıjesi boıynsha bas maman Q. Úsenbaev aýdandyq sáýlet jáne qala qurylysy bóliminiń buıryǵymen qyzmetinen bosatyldy. I. Beısebaevqa qatysty sharalar aýrýhanadan shyqqannan keıin qabyldanady. Tóbeles faktisi boıynsha qylmystyq is qozǵaldy, tergeý sharalary júrgizilýde. A. Ábdıbaev tergeý aıaqtalǵansha otyrǵan laýazymynan bosatyldy» -dedi A.Nurpeıisov.
Eske salsaq, Almaty oblysy Jambyl aýdany ákimi orynbasarynyń meıramhanadaǵy tóbelesi áleýmettik jelini shýlatqany jáne osy oqıǵaǵa qatysty oblys ákiminiń baspasóz hatshysy Ǵalymurat Júkeldiń túsinikteme bergeni týraly habarlaǵan bolatynbyz.
