Almaty oblysyndaǵy sanıtarlyq bekette mas júrgizýshi ustaldy
TALDYQORǴAN. QazAqparat - Almaty oblysyndaǵy sanıtarlyq bekette mas kúıdegi júrgizýshi ustaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 1 sáýir kúni túngi 01:00 shamasynda Eskeldi aýdanynyń tártip saqshylary TJ tártibine saı qoıylǵan sanıtarlyq beketten aýdan ortalyǵyna qaraı ótýge tyrysqan «Volkswagen Passat» kóligin toqtatqan. Áreketi kúmán týdyrǵan kólik júrgizýshisin medıtsınalyq tekserý barysynda onyń ishimdik ishkeni anyqtaldy.
«Bul soraqy jaǵdaı osy beket jumysyn bastaǵanda-aq tirkeldi. Tártip saqshylary men medıtsına qyzmetkerleri sanıtarlyq qyzmetti júrgizýdiń alǵashqy saǵatynda jol júrý erejesin óreskel buzýshy ustaldy. Temir tulpar ıesiniń qujattaryn tekserý barysynda spırttiń ıisi múńkip, kúdik týdyrǵan. Bekettegi medıtsına qyzmetkerleri oqıǵa ornynda onyń masań kúıde ekenin dáleldedi»,- dedi Eskeldi aýdany Polıtsııa bóliminiń bastyǵy polıtsııa maıory Ernar Shırbaev.
Kólik ıesi medıtsınalyq kýálandyrýdan ótip, nátıjesinde onyń orta dárejede mas ekeni anyqtaldy. Er adam birden medıtsınalyq aıyqtyrǵyshqa jetkizildi. Qoldanystaǵy ÁQbK 608-babyna sáıkes 1986 jyly týǵan azamatqa ákimshilik hattama toltyrylyp, is materıaldary sotqa joldandy. Zańǵa qaıshy áreketi úshin oǵan 15 táýlikke deıin ákimshilik qamaqqa alý jáne 7 jylǵa júrgizý quqyǵynan aıyrý túrindegi qatań jaza qoldanylýy múmkin.
