Almaty oblysyndaǵy Saqtan aýylynyń turǵyndary Memleket basshysyna alǵys aıtty
Jergilikti turǵyndar atynan Alıma Ospanova da osy ıgilikti is úshin Memleket basshysy Qasym-Jomart Toqaevqa aýyldyqtardyń alǵysyn jetkizdi.
Alıma Ospanova Almatydan Saqtan aýylyna 2017 jyly qonys aýdarǵan eken. Qaınar aýyldyq okrýgine qaraıtyn Saqtan eldi mekeni aýdan ortalyǵy - Talǵar qalasynan soltústik-batysqa qaraı 24 shaqyrym jerde ornalasqan. Kúre joldyń boıynda, iri megapolıske jaqyn ornalasqan shaǵyn ǵana eldi mekende jıyrma shaqty úı bar, jalpy turatyn halyq sany 200-ge jýyq. Táýelsizdik alǵaly beri aýyldyń joly jóndeý kórmegen. Turǵyndar «Halyq únine qulaq asatyn memleket» tujyrymdamasynyń arqasynda keteýi ketken aýylymyz qaıta jandandy dep sanaıdy.
«Bizdiń bul aýylǵa qonys aýdarǵanymyzǵa alty jyl boldy. Sodan beri osy jol máselesin jyl saıyn aıtyp kelemiz. 2019 jyly aýyl turyǵyndary atynan oblys ákimine joldy jóndeý týraly hat joldaǵan edik. Kóp uzamaı jaýabymyzdy aldyq. Onda qarjy bólinetini turaly aıtylǵan. Alaıda, sol kezdegi koronavırýs pandemııasyna baılanysty karantın bastaldy, odan keıingi jyldary oblysymyz ekige bólindi, osylaısha kótergen máselemiz «jabýly qazan» kúıinde qalyp qoıǵan syńaıly edi. Sosyn bıyl turǵyndar jınalyp Memleket basshysy Qasym-Jomart Toqaevtyń atyna ótinish hat joldadyq. Kóp ótken joq, QR Prezıdenti Ákimshiliginen janǵa jaǵymdy jaýap aldyq. Uzamaı mine kóshelerimizge asfalt tóselip, elektr baǵanalarymyz jańardy. Sol úshin de, Memleket basshysyna ózimniń jáne turǵyndardyń atynan alǵysymdy bildirip, rahmet aıtqym keledi»,- dedi ol.
Onyń sózinshe, qazir aýyldyń sáni kirip qalǵan. Úlken-kishi de, balalar da osyǵan asa rıza.
«Úsh nemerem osy aýylda týdy. Jol degeniń bir jaǵynan aýyldyń kórki eken ǵoı. Qazir kóshemiz Almatynyń arbaty sııaqty jarqyrap tur. Keshki ýaqytta balalar velosıped tebedi, oınaıdy. Qarapaıym aýyl turǵyndarynyń ótinishine nazar aýdaryp, týyndaǵan máselemizdi sheship bergenine óte rızamyz»,- dedi Saqtan aýylynyń turǵyny Alıma Ospanova.
Aıta keteıik, Memleket basshysy Qasym-Jomart Toqaev 2022 jylǵy «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda dál osy aýyl joldary problemasyn kótergen bolatyn. «Avtojol qurylysyna, sonyń ishinde jergilikti joldardyń sapasyna basa mán berý kerek. Bıýdjetten qyrýar qarjy bólinse de, bul másele áli sheshimin tappaı otyr. Men 2025 jylǵa deıin jergilikti joldardyń keminde 95 paıyzyn jaqsartý jóninde tapsyrma berdim. Úkimet bul máseleni tikeleı baqylaýǵa alsyn. Jol qurylysyndaǵy zańsyzdyqtardy anyqtaý qajet. Bul jumystan naqty nátıje shyǵarý kerek», degen edi Prezıdent sol Joldaýda.
