Almaty oblysyndaǵy Eskeldi bı kesenesi abattandyrylýda
TALDYQORǴAN. QazAqparat - Almaty oblysy Qaratal aýdanynda ornalasqan Eskeldi bı kesenesi abattandyrylýda, dep habarlaıdy QazAqparat tilshisi.
Bıyl tarıhı tulǵanyń týǵanyna 325 jyl. Memleket qorǵaýyna alynǵan tarıhı eskertkishke jergilikti bıýdjetten bıyl 27 mln. teńge qarjy bólinip, kesene aldyna tósenishter tóselip jatyr. Jan-jaǵy qorshalyp, aınalasyna 700 túp aǵash otyrǵyzylǵan.
Eskeldi Jylkeldiuly ataqty Tóle bıdiń Ulanbıke atty qyzynan týǵan jıen nemeresi. Ádil tóreligi men boıyndaǵy qasıeti ańyzǵa aınalǵan tarıhı tulǵa Almaty oblysynyń Qaratal aýdanynda jerlengen.
Jalpy, bul aýdanda 21 abyz-áýlıeniń kesenesi ornalasqan. Olardyń qatarynda Balpyq bı, Aıtý bı, Jolbarys batyr, Qarymbaı áýlıe, Jálmende bı, Pyshan aqyn syndy tarıhı tulǵalar bar.
Ataqty Tóle bı jıenin 12 jasqa deıin qasyna ertip júrip ózi tárbıelegen. Keıin Eskeldi bı han Abylaıdyń ýáziri atanyp, qazaq handyǵynyń ishki jáne syrtqy saıasatyna etene aralasady.
Eskeldi bı kesenesiniń shyraqshysy Baqbergen Júnisbaev baba rýhyna taǵzym etýshilerge bıdiń ómirbaıanyn, túrli qyzyqty oqıǵalaryn aıtyp otyrady. Shyraqshynyń aıtýynsha Eskeldi bı kesenesi 4-ret jańartyldy. 2015 jyly bıdiń urpaǵy akademık Edil Erǵojın bir top isker azamattyń qoldaýymen molaǵa zamanaýı kelbet bergen.
