Almaty oblysyndaǵy Erkin aýylynyń turǵyndary balalarynyń bilimine alańdaýly
TALDYQORǴAN. QazAqparat - Almaty oblysyndaǵy Sarqan aýdanyna qarasty Erkin aýylynyń turǵyndary balalarynyń bilimine alańdaýly. Sebebi, kórshi aýylǵa baryp qatynap oqıtyn joǵary synyp oqýshylary sabaqtan jıi qalady eken. Óıtkeni balalardy tasıtyn jóndi kólik joq, dep habarlaıdy QazAqparat tilshisi.
Amaldary taýsylǵan ata-analar balalary úshin búkil aýyl bolyp qarajat jınap, kólik satyp alǵan. Alaıda, onyń ózi qaıta-qaıta synyp, joldan qaldyrdy deıdi kópshilik. Jalpy Erkin aýylynan 20 ǵa jýyq oqýshysy Qarabóget aýylyna baryp, bilim alýda. Sebebi, atalǵan eldi mekende tek bastaýysh synyby ǵana bar.
«Balalarymyz jıi sabaqtan qalady. Bilimderine qatty alańdaımyz. Mektepke tasýǵa negizi eki kólik berdi. Biraq ekeýi de eski. Júrgeninen turǵany kóp. Qazir buzylyp júrgizýshiniń aýlasynda tur. Aýyl bolyp aqsha jınap, kólik satyp aldyq. Onyń ózi de eski», - deıdi aýyl turǵyny Qudaıbergen Jumaǵalıev.
«Bárimiz jabylyp qysta sýyqta ıteremiz. Іshi óte sýyq. Jáne esigi durys jabylmaıdy. Ashylyp qala beredi», - deıdi 10 synyp oqýshysy Balnur Qasymhanova.
Al, Sarqan aýdany ákiminiń orynbasary Marat Razbekov Erkin aýyly turǵyndarynyń jaǵdaıynan habarsyz bolyp shyqty. Kópshiliktiń óz erikterimen kólik satyp alǵandyǵy sheneýnikti tańǵaldyrdy. Endi ákim orynbasary atalǵan máseleniń mán-jaıyn anyqtap, tekseremiz dep otyr. Qajet bolǵan jaǵdaıda máseleni sheship beremiz dep ýáde berdi.
