Almaty oblysyndaǵy Erkin aýyly aýyz sýǵa jarymaı otyr
TALDYQORǴAN. QazAqparat - Almaty oblysyndaǵy Sarqan aýdanyna qarasty Erkin aýyly aýyz sýǵa jarymaı otyr. Aıta keterligi, osydan úsh jyl buryn aýylǵa aýyz sý máselesin sheshý úshin bıýdjetten qarajat bólingen.
Alaıda jergilikti jurtshylyq áli tirshilik nárine jarymaı keledi, dep habarlaıdy QazAqparat tilshisi.
Aýyl turǵyndarynyń sózine qaraǵanda, aýyz sý qazirgi kúni táýligine eki saǵat beriledi. Alaıda sol eki saǵattyń jartysynda qudyqtan tat aralas sary sý aǵatyn kórinedi. Jergilikti bıliktiń ýádesine de jurt nalı bastaǵan.
«Sý tasyp ishýden mezi boldyq. Qysta qudyq qatady, kóktemde balshyq. Osydan 2-3 jyl buryn tıisti qarajat bólindi degen bolatyn ákimshilik. Sonda jasaǵany osy», - deıdi Erkin aýylynyń turǵyny Jantas Jumaǵalıev.
Aıta keterligi, Sarqan aýdanynyń ákimdigi Erkin aýylyndaǵy aýyz sý máselesine 3 jyl buryn bıýdjetten 30 mln teńge bólingenin rastap otyr. Biraq, aýylǵa aǵymdaǵy jóndeý emes, kúrdeli jóndeý qajet bolǵan. Sol sebepti qarjy keri qaıtarylǵan. Qazir aýyldyń aýyz sý túıtkilin sheshý úshin oblysqa suranys jasalǵan. Al erkindikterdiń bar tilegi saǵyzsha sozylǵan aýyz sý máselesiniń tezirek sheshilgendigi.
