Almaty oblysyndaǵy apatqa on jyl: Qyzylaǵashtyqtar halyqtyń jaqsylyǵyn umytpaıdy
TALDYQORǴAN. QazAqparat - Almaty oblysyndaǵy Qyzylaǵash apatyna búgin týra 10 jyl. 2010 jyly naýryz aıynyń 11-inen 12-ne qaraǵan túni Qyzylaǵash sý qoımasynyń bógeti jarylyp, 45 adam qaza tapqan bolatyn.
Sol jyly naýryz aıynyń alǵashqy on kúndiginde kún kúrt jylynyp, qar aralas jańbyr jaýyp, Almaty oblysy aýmaǵyndaǵy sýqoımalardaǵy sý shekti mólsherden asa bastaıdy. 11 naýryzda Qyzylaǵash ózeninde ornalasqan sý qoımasynyń arnasy da tolyp, 42 mln tekshe metr sý jınalady. Bóget shydas bermeı túngi 12-ler shamasynda sý bógeti jarylyp, qalyń sý ózen arnasymen aýylǵa qaraı tap beredi. Jergilikti bılik, tártip saqshylary turǵyndardyń basym bóligin eskertip, qaýipsiz jerge shyǵaryp úlgeredi.
«Alaıda estimeı qalǵan, qaýipti jaǵdaıǵa senińkiremegen jandar sý tasqyny kezinde shyǵyp úlgermedi», dep eske alady aýyl turǵyndary. Altyngúl Bábekeıdiń sol kezde aıaǵy aýyr edi. Apat bolǵan kezde aı-kúni jaqyndaǵan kelinshek bala-shaǵasymen jaqyn jerdegi taý bókterine áreń shyǵyp úlgeredi. «Jylqynyń kisinegeni, qoıdyń mańyraǵany, eshkiniń daýystary Taldyqorǵannyń ber jaǵyna 15 mınýt uzaǵan kezge deıin estilip turdy. Solardy men máńgi baqı umytpaımyn», deıdi Altyngúl Bábekeı.
Apattan aman qalyp, Taldyqorǵan qalasynda bosanǵan ana ulynyń esimin yrymdap Tasqyn qoıady. Qazirgi tańda bala Tasqyn 10 jasta. Ata-anasyna qolǵanat, sabaǵynda ozat. Esiminiń tarıhy jaıynda áke-sheshesi men aýyldastarynan ábden qanyq bala – «Endi qaıtadan ondaı sý apaty bolmasyn, elimiz tynysh adamdar tynysh ómir súrsin» dep tileıdi.
Al qyzylaǵashtyq Janbolat Dáýken aýyldan sol kezde otbasymen 12 shaqyrym jerdegi qystaqta mal baǵyp turyp jatqan. Týystary apat bolǵanyn habarlap úlgeredi. Odan keıin uıaly baılanys ta isten shyǵady. Túnniń bir ýaǵynda sý úıine kire bastaǵan. Shopan bala-shaǵasyn alyp, monshanyń aǵashtaryna shyǵyp, jan saýǵalaǵanyn aıtady. «Úıdiń artynda bir kanal boldy. Sodan ótken kezde mashınanyń ózi kórinbeı ketti sýdan. Ol kisiler ózderi ázer shyqty. Mashınaǵa otyrǵanda esimizdi biraq jınadyq shynyn aıtqanda. Áıteýir jaryq dúnıe kóredi ekenbiz ǵoı, aman qaldyq» dep sol sátterdi keshe bolǵandaı eske alyp otyr.
Qyzylaǵashtyń qyzyl sýy sol kezde Aqtoǵan, Eginsý, Molaly eldi-mekenderine deıin jetken. Jalpy 2010 jyly Almaty oblysynda birneshe sýqoımanyń jarylýy qaýpi tóngen bolatyn. Aqeshki, Kúrti sý qoımalarynyń arnasy toldy. Áskerı qurylymdar tartylyp, sýqoımalardyń jaǵasy bekitilip, ózenderge sý molyraq jiberile bastady. Al Qazaqstan halqy aýyzbirlik tanytyp tutas bir aýyldy jarty jyl ishinde aıaǵyna turǵyzdy. Sý tasqynynan zardap shekkenderge materıaldyq kómek berilip, tórt túlik malǵa deıin taratyldy. Aýyldyń áleýmettik nysandary qalpyna keltirilip, halyq kúndelikti turmys-tirshiligine oraldy. Apat kýágerleri osy bir qıyn-qystaý kezeńde kómek bergen otandastaryna alǵysy sheksiz. 10 jyl ótse de qyzylaǵashtyqtar halyqtyń jaqsylyǵyn umytpaǵan.
