Almaty oblysyndaǵy alapat órt: 32 adam qaýipsiz jerge kóshirildi
TALDYQORǴAN. QazAqparat - Almaty oblysynyń órt sóndirýshileri tańerteń 8-de turǵyn úıde tutanǵan órtti áli sóndirip jatyr, dep habarlaıdy «QazAqparat» HAA tilishisi QR ІІM TJK resmı ókili Rýslan Imanqulovqa silteme jasap.
2017 jylǵy 1 qazan kúni tańǵy 8 shamasynda oblys ortalyǵynan 120 km qashyqtyqtaǵy Jansúgirov aýylynda turǵyn úıden órt shyqqany týraly habar kelip, №25 órt sóndirý bólimshesi shuǵyl túrde attanǵan. 1959 jyly salynǵan 16 páterli turǵyn úıdiń aǵash shatyry tolyqtaı derlik órtenip, ekinshi qabatqa ótken. Jyldam sharalardyń arqasynda 32 adam qaýipsiz jerge kóshirilgen, japa shekkender joq.
Órt shyqqan jerden 30 shaqyrymdaǵy Sarqant aýylynyń bólimsheleri, qosymsha túrde erkin aýysymdaǵy jeke quram, Taldyqorǵan órt sóndirý jedel toby jumyldyrylǵan. Órtten úıdiń shatyry, ekinshi qabattaǵy 8 páter órtengen.
Aldyn ala málimetter boıynsha órt sharpyǵan aýmaq 440 sharshy metrdi qamtyǵan, páterlerdiń órtengen aýmaǵy jalpy - 347 sharshy metr.
Órt 09 saǵat 51 mınýtta aýyzdyqtalǵan. Órt bolǵan jerde Almaty oblysy ákiminiń birinshi orynbasary L.M. Turlashevtiń, Almaty oblystyq TJD bastyǵy azamattyq qorǵanys polkovnıgi D.E. Baısarıevterdiń basshylyǵynda tótenshe jaǵdaıdy eskertý jáne joıý jónindegi oblystyq komıssııa jumys istep jatyr.
