Almaty oblysynda zorlanǵan 56 jastaǵy áıel aýrýhanadan shyqty
ALMATY. QazAqparat - Almaty oblysynda zorlanǵan 56 jastaǵy áıel aýrýhanadan shyqty. Bul týraly áleýmettik jelidegi «Seksýaldy zorlyqqa qarsy ulttyq qozǵalys» tobynda habarlandy.
Eriktilerdiń jazýyna qaraǵanda, zorlyq kórgen áıel 28 qyrkúıek kúni Esik qalasyndaǵy aýrýhanadan shyqqan.
«Týysqandarynyń aıtýynsha, onyń jaǵdaıy áli de aýyr. QR Densaýlyq saqtaý jáne áleýmettik damý mınıstrligi onyń kózine ota jasaýǵa kvota bóldi. Alaıda, onyń densaýlyǵy otany kóteretin jaǵdaıda emes. Onyń basy men denesindegi isik ketken joq. Onyń dene jaraqattary áli de bar, bas aýrýy basylmaı otyr. Dárigerler bul úsh-tórt aıǵa sozylýy múmkin ekenin aıtypty. Týysqandary mundaı jaǵdaıda ony aýrýhanadan shyǵarý erte dep sanaıtynyn, medıtsınalyq emdeýdiń tolyq kýrsynan ótip bitpedi dep sanaıtynyn aıtyp otyr», dep jazylǵan áleýmettik jelidegi habarlamada.
Zorlyq kórgen áıeldiń aǵaıyn-týystarynyń aıtýynsha, qylmyskerdiń áli de qolǵa túspeı, qamalmaǵany olardyń ashý-yzasyn týǵyzǵan. Almaty oblysy ІІD-niń habarlaýynsha, kúdikti anyqtaldy. Іs qazir QR QK 120-babynyń 2 bólimi (zorlaý) boıynsha sotqa deıingi tergep-tekserýdiń biryńǵaı tizilimine alynǵan.
Eske sala keteıik, 21 qyrkúıek kúni Almaty oblysynyń «Báıterek» aýylynda 56 jastaǵy áıel zorlanǵan bolatyn.
Bul týraly zardap shekken áıeldiń týystary áleýmettik jelide habarlaǵan. Olardyń aıtýynsha, 56 jastaǵy áıel óziniń «Báıterek» aýylyndaǵy úıinde aıaýsyz zorlanǵan.
