Almaty oblysynda jylyna 8 myń tonna et óńdeıtin kombınat salynyp jatyr
TALDYQORǴAN. QazAqparat - Almaty oblysynyń ákimi Amandyq Batalov jumys saparymen Jambyl aýdanyna bardy. Sapar barysynda oblys basshysy birqatar mańyzdy nysandar men áleýmettik jobalardyń júzege asyrylý barysymen tanysty, dep habarlaıdy QazAqparat Almaty oblysy ákiminiń baspasóz qyzmetine silteme jasap.
A. Batalov aldymen «Imperııa Fýd» JShS et kombınatynyń qurylysymen tanysty. «Imperııa Fýt» seriktestigi byltyrdan beri ınvestıtsııa kólemi 2,3 mlrd teńgeni quraıtyn et óńdeý zaýytynyń qurylysyn júrgizýde. Nysan jumystary bıylǵy jyldyń qyrkúıek aıynda aıaqtalýy tıis. Bul jobanyń qýattylyǵy jylyna 8 myń tonna et óńdeýge qaýqarly bolmaq. Zaýytqa deıin ınfraqurylym júrgizý úshin oblystyq bıýdjetten 80,1 mln teńge bólingen. Qazirgi kezde qurylys jumystary júrip jatyr. Seriktestik buǵan deıin ınvestıtsııalyq quny 1,4 mlrd. teńgeni quraıtyn mal bordaqylaý alańyn saldy. Jyl basynan beri 55 tonnaǵa jýyq et ótkizilgen.
Munan keıin oblys ákimi A. Batalov Qasymbek aýylyndaǵy «Teksan Qazaqstan Invest» JShS jaryq-elektr tehnıkalaryn jáne metall buıymdaryn shyǵaratyn zaýytyna atbasyn tiredi. Zaýyt 2012 jyldan beri jumys isteıdi.
Bas dırektory Dıas Qurmashevtiń aıtýynsha, zaýytta svetodıodty shyraqtardyń 350-den astam túri shyǵarylady. Olardyń qatarynda keńsege, kóshege, turmysqa jáne ónerkásip oryndaryna arnalǵan shamdar da bar. Sonymen qatar partalar, kóshege, saıabaqtarǵa arnalǵan oryndyqtar, keńse seıfteri jəne basqa da buıymdar shyǵarady. Zaýyt aıyna 200 myń birlik ónim shyǵaryp otyr. Bul elimizdegi naryq suranysynyń 70 %-yn qamtyp otyr. Zaýyttyń ónimderi taıaý shetelderge, sonymen qatar Parsy shyǵanaǵy men Latyn Amerıkasyna eksporttalady. 2016 jyly Dýbaı men Panama qalalarynda fılıaldary ashylǵan. Óndirilgen ónimdegi qazaqstandyq mazmun 92% quraıdy. Jyl saıyn zaýyttyń tehnıkalyq jaraqtandyrylýyna 500 mln. teńge ınvestıtsııa tartylady. Zaýytta 220 jumysshy bar. Oblys basshysy A. Batalov osyndaı sapaly dúnıelerdi Taldyqorǵan qalasyn kórkeıtý jumystaryna qoldanýdy qarastyrýdy orynbasary A. Baıjanovqa tapsyrdy.
