Almaty oblysynda jylqy urlaǵan shetel azamaty ustaldy
TALDYQORǴAN. QazAqparat – Almaty oblysynda mal urlady degen kúdikpen shetel azamaty ustaldy, dep habarlaıdy QazAqparat.
Qylmystyq is materıaldaryna sensek, kúdikti – 25 jastaǵy Ózbekstan azamaty.
Ótken jyldyń maýsym aıynda Jambyl aýdany polıtseılerine jergilikti sharýalardyń biri shaǵymdanyp keldi. Aıtýynsha, 4 jylqysy qoldy bolǵan. Polıtseıler birden taıaýda ǵana eshteńe túsindirmeı, sharýa qojalyǵyndaǵy jumysynan shyǵyp ketken malshydan kúdiktendi.
«Jedel izdestirý kezinde jylqylardy kórshiles Jambyl oblysynan taptyq. Keıin anyqtalǵandaı, Ózbekstan azamaty 4 jylqyny mal bazaryna aparyp satyp, 1 mln teńge paıda kórgen. Jas jigit bir jyldan astam ýaqyt tártip saqshylarynan jasyrynyp, ár jerge kóship otyrdy. Taıaýda kúdikti Almaty mańyndaǵy bazarlardyń birinde qolǵa tústi», - dep málim etti oblystyq polıtsııa departamentiniń baspasóz qyzmeti.
Kúdiktiniń sondaı-aq Qansheńgel aýylyndaǵy mototsıkl urlyǵyna qatysy bar bolyp shyqty. Mototsıkl tabylyp, ıesine qaıtaryldy.
«Azamattyń basqa da qylmystarǵa qatysy bar-joǵy anyqtalyp jatyr. Qamaýǵa alynǵan. Odan bólek, kóshi-qon zańyn buzǵany úshin de jaýapqa tartylady» deıdi baspasóz qyzmeti.
