Almaty oblysynda jyldyń úzdik ustazyna kólik kilti tabys etildi
TALDYQORǴAN.QazAqparat - Almaty oblysynda «Jyldyń úzdik ustazy» ataǵyn Alma Mahanova jeńip aldy. Jambyl aýdanyndaǵy A.Beıseýov atyndaǵy orta mekteptiń atynan synǵa túsken jeńimpazǵa oblys ákimi sý jańa avtokóliktiń kiltin tabystady, - dep habarlaıdy QazAqparat tilshisi.
Esterińizge sala keteıik, osydan eki jyl buryn ıaǵnı 2016 jyly dál osy nomınatsııa Jambyl aýdanyna buıyrdy. Ú.Káribaev atyndaǵy orta mekteptiń bıologııa pániniń muǵalimi Gúlhan Nurǵazıeva baıqaýdyń bas júldesin qanjyǵalap, avtokólik jeńip alǵan bolatyn.
Búgin Taldyqorǵanda Muǵalimder kúni qarsańynda óńirdiń bilim salasyna eńbegin sińirgen ardager, zeınetker pedagogtar men osy kúnde jastardy bilim nárimen sýsyndatyp, bar bilimi men biliktiligin urpaq tárbıeleý isine aıamaı júrgen bir top ustazdar marapattaldy. Marapattalýshylar qatarynda «QR Bilim berý isiniń úzdigi» ataǵy men QR Bilim jáne ǵylym mınıstrliginiń «Y.Altynsarın atyndaǵy tósbelgisine» ıe bolǵandar da boldy. Saltanatty shara barysynda Qarasaı aýdanyndaǵy Jambyl atyndaǵy orta mektep «Úzdik aýyldyq mektep», al Eńbekshiqazaq aýdanyndaǵy mektepke deıingi «Báıterek» mekemesi «Úzdik balabaqsha» dep tanyldy.
Qazirgi tańda oblysymyzdyń bilim berý salasynda 35 myńnan astam adam eńbek etýde. Túrli respýblıkalyq baıqaýlarda oblysymyzdyń ustazdary joǵary nátıjeler kórsetýde. Atap aıtqanda, «2018 jyldyń úzdik muǵalimi» baıqaýynda Almaty oblysynyń bir top ustazdary laıyqty túrde «Úzdik pedagog» ataǵyna ıe boldy.
