Almaty oblysynda júrgizýshi joldyń qarsy jolaǵyna shyǵyp, «Skýtermen» soqtyǵysty, onyń saldarynan 2 jasóspirim qaza tapty
ASTANA. QazAqparat - Kóksý aýdandyq sotynda eki jasóspirim qaza tapqan jol-kólik oqıǵasyna kináli A.Ormanbetovqa qatysty qylmystyq is qaraldy.
Oblystyq sottyń baspasóz qyzmetiniń habarlaýynsha, «Volkswagen Golf» kóligin alkogoldik mas kúıinde júrgizgen A.Ormanbetov joldyń qarsy jolaǵyna shyǵyp, jasóspirim júrgizip kele jatqan «Bewheel» markaly «Skýtermen» soqtyǵysty. Jol apaty saldarynan «Skýterdiń» júrgizýshisi men jolaýshysy Kóksý aýdandyq aýrýhanasynyń jansaqtaý bóliminde qaıtys boldy.
Sot úkimimen A.Ormanbetov QK-niń 345 babynyń 4 bólimimen (abaısyzda eki adamnyń ólimine soqtyrǵan jol qozǵalysy erejesin jáne kóliktik quraldy basqarý erejesin buzý) aıypty dep tanyldy. Oǵan abaqtyda 7 jyl 6 aı bas bostandyǵynan aıyrý jazasy berilip, 7 jyldyq merzimge kólik quraldaryn basqarý quqyǵynan aıyryldy.
