Almaty oblysynda júrgizýshi kólikpen adamdy qasaqana basyp óltirgen
TALDYQORǴAN. QazAqparat - Almaty oblysynda júrgizýshi jaıaý júrginshini qasaqana túrde kóligimen basyp, qashyp ketken. Zardap shekken turǵyn oqıǵa ornynda kóz jumǵan, - dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, 19 mamyr kúni saǵat 19:00 shamasynda Qarasaı aýdanynyń polıtsııa basqarmasyna habarlama túsken. ıAǵnı, Qaskeleń qalasynda 50 jastaǵy jergilikti turǵyn men belgisiz azamattyń arasynda kıkiljiń týyndap, kólik ıesi qasaqana túrde jergilikti turǵyndy kóligimen basyp, qashyp ketkendigi jóninde aıtylǵan. Atalǵan fakti QR QK 99-baby ıaǵnı, «Adam óltirý» boıynsha tirkelip, tártip saqshylary oqıǵa ornyna barǵan.
«Kýágerlerdiń aıtýy boıynsha, kóliktiń markasy men baǵyt alǵan mekenjaıy anyqtalǵan. Іzdeýge kirisken polıtseıler aýyldyń shetinen «Folksvagen Golf-3» kóligin tapqan. Sol mańnan onyń 61 jastaǵy ıesi tabylǵan. Ol Qaskeleń qalasynyń turǵyny bolyp shyqty»,- delingen vedomstvonyń habarlamasynda.
Ustalǵan júrgizýshiniń jeńil dárejede ishimdik ishkeni anyqtaldy. Ol bolǵan oqıǵa boıynsha kinásin joqqa shyǵarmady. Anyqtalǵandaı, jábirlenýshi men kúdiktiniń arasyndaǵy janjal jol erejesine baılanysty týyndaǵan. Jaıaý júrginshi kóliktiń ústine shyǵyp, terezesin ura bastaǵan. Sol sátte júrgizýshi kólikti qozǵaltyp, birden toqtatyp, adamdy jerge túsirgen. Osy sátte kúdikti kóligimen qasaqana túrde adamdy basyp, oqıǵa ornynan qashyp ketken. Qazir 61 jastaǵy azamat qamaýǵa alyndy. Sotqa deıingi tergeý júrgizilip jatyr.
