Almaty oblysynda jumyssyzdar tegin bilimmen qatar shákirtaqy alady
TALDYQORǴAN. QazAqparat - Almaty oblysynyń Tekeli qalasynda jumyssyzdardy tigin isine tegin oqytatyn oqý ortalyǵy ashyldy. Azamattar tegin bilimmen qatar, memlekettik shákirtaqy da alatyn bolady, dep habarlaıdy QazAqparat tilshisi.
Oqý ortalyǵy 2017-2021 jyldarǵa arnalǵan «Ónimdi jumyspen qamtý jáne jappaı kásipkerlikti damytý» baǵdarlamasy aıasynda ashylǵan. Maqsat -jumyssyzdardy qysqa merzim ishinde oqytyp, isin dóńgeletýge múmkindik berý.
«Tekeli barys» kásipornynyń basshysy Áıgerim Sákenqyzynyń aıtýynsha, qazirgi tańda 30 adam ortalyqta jańa mamandyq alýǵa nıet bildirip otyr.
«Oqý ortalyǵynda sabaqtar men tájirıbelik oqýlar ótkizýge arnalǵan bólmeler bar. 13 tigin mashınasyn, qajetti matalar men materıaldardy satyp aldyq. Oqýshylar bilim alýmen birge tapsyrys alyp, ony oryndap otyrady. Kýrstyń sońyna qaraı qatysýshylardyń keıbirin kompanııamyzǵa jumysqa alsaq degen nıettemiz», - deıdi kásipker.
«Tekeli barys» JShS oqý ortalyǵy Tekelide kásiporyn bazasynda ashylyp, Óńirlik kásipkerler palatasy janyndaǵy oqý ortalyqtarynyń reestrine engen alǵashqy mekeme. Kásipkerler palatasynyń Tekeli qalalyq fılıalynyń dırektory Turysbek Jumadilovtyń sózinshe, aldaǵy ýaqytta Tekeli taý-ken óńdeý kesheninde de oqý ortalyǵyn ashý josparlanǵan. Onda metallýrgııa salasyna qajetti mamandardy daıyndaıtyn bolady.
Aıta ketý kerek, bıyl Almaty oblysynda «Ónimdi jumyspen qamtý jáne jappaı kásipkerlikti damytý» baǵdarlamasy aıasynda qysqamerzimdi bilim kýrsy arqyly 500 adamdy jańa mamandyqqa oqytý josparlanyp otyr.
