Almaty oblysynda jumyssyzdar sany 50 myńǵa jýyqtady
Bul jóninde 28 sáýir kúni QR Eńbek jáne halyqty áleýmettik qorǵaý mınıstri Tamara Dúısenovanyń qatysýymen Taldyqorǵanda ótken jıynda málim boldy. Oblystyq ákimdikte bolǵan basqosýda mınıstr Tamara Dúısenova «Qazaqstannyń úshinshi jańǵyrýy - jahandyq básekege qabilettilik» Joldaýy aıasynda Nátıjeli jumyspen qamtýdy jáne jappaı kásipkerlikti damytý baǵdarlamasyn júzege asyrý máseleleri jóninde semınar-keńes ótkizdi.
Atalǵan baǵdarlamany Almaty oblysynda júzege asyrýǵa 9 mlrd teńgeden astam qarjy bólingen. Jıynda baıandama jasaǵan Eńbek jáne halyqty áleýmettik qorǵaý mınıstri jańa baǵdarlamany jan-jaqty túsindirip berdi. Qarastyrylyp otyrǵan jeńildikter jaıynda da sóz qozǵady. Máselen, buryndary sharýalar nesıe alý úshin anyqtamalyq qujattyń 30-yn jınaıtyn. Bıyl onyń sany 14-ke deıin azaıtyldy.
Al, zańdy tulǵalarǵa 9 qujatqa deıin qysqarǵan. Osyǵan deıin beriletin nesıe 3 mln teńge kóleminde bolsa, endi 18 mln teńgege deıin jetkizilip otyrǵanyn aıtty. Sondaı-aq, bıyl Almaty oblysynda 74 myńnan astam jańa jumys orny ashylmaq. Turǵyndardy eńbekpen qamtý máselesi «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda atqarylatyn bolady. Baǵdarlama maqsaty oqytý negizinde qazaqstandyqtardyń naqty kásiptik daǵdysyn damytý bolyp sanalady.
