Almaty oblysynda jumyspen qamtý baǵdarlamasy arqyly bıýdjet qarjysyn jymqyrǵandar anyqtaldy

TALDYQORǴAN. QazAqparat - Almaty oblysy Balqash aýdanynyń prokýratýrasy «Jumyspen qamtý kartasy - 2020» baǵdarlamasynyń oryndalýyn tekserip, bıýdjet qarajatyn jymqyrý faktilerin anyqtady. Atap aıtqanda, áleýmettik jumys oryndaryna jumysqa qabyldaý boıynsha jalǵan faktiler keltirilip, birqatar olqylyqtarǵa jol berilgen, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap.

«Máselen, tekserý barysynda «Tezekbaı» sharýa qojalyǵyna jumysqa qabyldanǵan N.Shaǵylbaev, S.Qusaıynov jáne A.Kemal ózderiniń 20 000 teńge jalaqy alyp júrgenderin kórsetken. Al  Jumyspen qamtý ortalyǵy men sharýa qojalyǵynyń arasyndaǵy kelisimshart boıynsha jalaqy mólsheri 54 000 teńgeni quraǵan. Sondaı-aq, «Aısha» sharýa qojalyǵynda qujat júzinde 3 azamat jumyspen qamtylǵany kórsetilgenimen, shyndyǵynda onda eshkimniń de jumys atqarmaǵany anyqtaldy», - delingen baspasóz baıanynda. 

Osy faktiler boıynsha prokýrorlar aýdan ákimdigine Jumyspen qamtý ortalyǵy men sharýa qojalyqtary arasyndaǵy eńbek sharttaryn buzý týraly usynys engizdi. Budan bólek, jumys berýshilerge tólengen sýbsıdııalardy memleket paıdasyna qaıtarý talap etilip, zań buzýshylyqty joıý máselesi de qaralatyn bolady. Sonymen qatar, tekserý barysynda anyqtalǵan faktiler boıynsha sheshim qabyldaý úshin is materıaldary ekonomıkalyq tergeý qyzmetine jiberildi.