Almaty oblysynda jumys babynda qaıtys bolǵan dárigerge berilgen úıdiń qujattary joq
TALDYQORǴAN. QazAqparat - Almaty oblysynda 2016 jyldyń 27 qańtarynda sanıtarlyq avıatsııa tikushaǵymen apatqa ushyrap, qaıtys bolǵan gemotolog-dáriger Baqytgúl Qaısanovaǵa berilgen úıdiń birde-bir qujattary joq. Marqumnyń jaqyndary oblys ákimdigi tarapynan berilgen bir bólmeli páterden aıyrylyp qalamyz ba dep alańdap otyrǵanyn jetkizdi, dep habarlaıdy QazAqparat tilshisi.
Al 25 jyldan astam medıtsına salasynda eńbek etken, oblystaǵy jalǵyz gemotolog dáriger bolǵan Baqytkúl Qaısanovaǵa baspana tiri kúninde buıyrmaǵan. Bıyl jeti jasqa endi tolǵan Aqerke esimdi jalǵyz qyzymen Baqytgúl Iebekqyzy páter jaldap kún keshken. Al dárigerge baspana onyń qazasynan keıin ǵana berilgen bolatyn.
«Atalǵan másele boıynsha qazirgi tańda qujattar daıyndalyp jatyr. Rásimdep bolǵan soń murager qyzdyń qolyna tabystalady. Bul máseleniń sońyna deıin jetkenin BAQ arqyly habarlaımyz», - dedi Almaty oblysy ákiminiń baspasóz hatshysy Ǵalymurat Júkel.
Esterińizge sala keteıik, osydan eki jarym jyl buryn bolǵan tikushaq apatynan bes adam qaza boldy. Olar Alakól aýdanyndaǵy Úsharal qalasynan leıkoz dertine shaldyqty degen kúdikpen Baǵym esimdi eki aılyq sábıdi sanavıatsııamen Taldyqorǵanǵa jetkizbek bolǵan. Alaıda, oblys ortalyǵyna 18 shaqyrym qalǵan kezde tikushaq apatqa ushyrap, áýe bortynda bolǵan bes adam, ıaǵnı 27 jastaǵy ana eki aılyq sábıimen, 52 jastaǵy gemotolog-dáriger Baqytgúl Qaısanova, 49 jastaǵy ushqysh jáne 27 jastaǵy feldsher Gúlnur Hamıtova kóz jumdy. Al Gúlnur Hamıtova bir otbasynyń jalǵyz balasy edi. Marqumdardyń denesi 15 saǵattyq izdeýden keıin ǵana tabyldy.
