Almaty oblysynda júkti áıelge eki operatsııa bir ýaqytta jasaldy
QONAEV. QazAqparat – Almaty kópsalaly klınıkalyq aýrýhanada 30 jastaǵy júkti áıelge eki ota bir sátte jasaldy, dep habarlaıdy QazAqparat tilshisi.
Almaty oblysy densaýlyq saqtaý basqarmasynyń málimetinshe, aýrýhananyń qabyldaý bólimine oń jaq betiniń aımaǵynda aýyrsyný men qan ketýge baılanysty otyz jastaǵy áıel kelip tústi. Naýqastyń aıtýynsha, ol jeke stomatologııalyq klınıkaǵa baryp, azý tisin juldyrǵan. Sonyń orny jazylmaı kaıta-qaıta qanap, isik paıda bolǵan.
Naýqas jaq-bet hırýrgııasy bólimine óte aýyr jaǵdaıda keldi. Onyń gemoglobıni tómendep, oń jaq beti isip, tistiń eti qyzaryp, shamadan tys mólsherge ulǵaıyp ketken. Sonymen qatar naýqas júktiliktiń 37-shi aptasynda boldy. «Áıeldiń júktiligin eskere otyryp, klınıka dırektory E.A. Berikova, perzenthana meńgerýshisi, gınekolog, medıtsınalyq bólim boıynsha orynbasary jáne jaq-bet hırýrgııasy bólimshesiniń dárigerlerinen turatyn shuǵyl konsılıým jasadyq. Konsılıým gemoglobınniń synı deńgeıine jáne uzaq ýaqyt boıy qan joǵaltý kólemine, sondaı-aq jalpy anestezııamen jaq-bet operatsııasyn júrgizýge baılanysty naýqasqa kesar tiligi jáne qan quıý operatsııasyn júrgizý týraly sheshim qabyldady», - deıdi bólim meńgerýshisi Marat Ysqaqov.
Ota kezinde tamyrly hırýrgtar jappaı qan ketýdi eskere otyryp, syrtqy uıqy arterııasyn baılap tastady. Osydan keıin gematomalar men súıek synyqtary alyndy. «Hırýrgııalyq aralasý kezinde joǵarǵy jaq súıeginiń tómengi perforatsııasy jáne joǵarǵy jaq osteomıelıti tabyldy, qorytyndysy boıynsha 1.6, 1.8 tister alynyp tastaldy. Tolyq operatsııadan keıin jáne perforatsııa jabylǵannan keıin naýqastyń jaǵdaıyn turaqtandyrý úshin reanımatsııa bólimine aýystyryldy», - dedi dáriger. Dárigerlerdiń sózinshe, qazir naýqas pen balanyń jaǵdaıy qanaǵattanarlyq dep baǵalanady. Olar jaqyn arada úıge shyǵarylady.
