Almaty oblysynda júkti áıel qar qursaýynan qutqaryldy
TALDYQORǴAN. QazAqparat – Almaty oblysynda tótenshe jaǵdaılar departamentiniń qyzmetkerleri jedel járdem kóligimen aýrýhanaǵa bara jatqan júkti áıeldi qutqardy, dep habarlaıdy QazAqparat oblystyq TJ departamentine silteme jasap.
«Oqıǵa 24 qańtarda Kerbulaq aýdanynda oblystyq mańyzy bar Saryózek-Shanhanaı avtojolynda bolǵan. Aýa-raıynyń qolaısyzdyǵynan Shanhanaı aýylynan Kerbulaq aýdanynyń ortalyq aýrýhanasyndaǵy perzenthanaǵa júkti áıeldi apara jatqan jedel járdem qarda turyp qalǵan», - dep habarlady oblystyq TJD.
Sonymen birge, joldyń osy bóliginen 28 adam jáne 18 avtokólik evakýatsııalandy, taǵy 17 adamnyń kóligi jol boıynda qaldy.
Qutqarý jumystaryna Almaty oblysy TJD 7 qyzmetkeri men 2 tehnıkasy, 3 áskerı qyzmetshi jáne QR Qorǵanys mınıstrliginiń № 40265 áskerı bóliminiń 1 tehnıkasy jumyldyryldy.
