Almaty oblysynda judyryqpen ústeldi urǵan bas dárigerdiń áreketi tekserilýde
TALDYQORǴAN. QazAqparat - Almaty oblysynda turǵyndarmen kezdesý barysynda ústeldi judyryqpen urǵan aýrýhananyń bas dárigerine qatysty tekseris bastaldy, dep habarlaıdy QazAqparat tilshisi.
«Búgingi kúni QR Eńbek kodeksiniń 64-baby 1-bóliginiń 4-tarmaǵyna sáıkes, Almaty oblystyq Densaýlyq saqtaý basqarmasy tarapynan komıssııa quryldy. Arnaıy top Talǵar aýdandyq aýrýhanasynyń bas dárigeri N. G. Kúlseıitovtiń etıkalyq áreketine qatysty máseleni qaraıdy. Qabyldanǵan shara habarlanatyn bolady», - delingen Almaty oblystyq Densaýlyq saqtaý basqarmasynyń resmı málimdemesinde.
Aıta keteıik, Talǵar aýdandyq aýrýhanasynyń bas dárigeri kezdesý barysynda turǵyndardyń biriniń qoıǵan suraǵyna ashýlanyp, ústeldi judyryqpen urǵan. Artynsha zaldan shyǵyp ketken. Al turǵynnyń ashý týdyrtqan suraǵy aýrýhanada dárilerdiń jetispeýi jóninde bolǵan.
