Almaty oblysynda joldardy kútip ustamaǵan kompanııalar jaýapqa tartylýda
TALDYQORǴAN. QazAqparat – Almaty oblysynda avtojoldarǵa jaýapty tulǵalar jappaı jaýapkershilikke tartylyp jatyr, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, Alakól aýdany polıtsııa bóliminiń Jol-tehnıkalyq ınspektsııa qyzmetkerleri jol-kólik oqıǵalarynyń aldyn alý maqsatynda respýblıkalyq jáne aýdandyq avtojoldar men kóshelerde qysqy mezgildegi joldy tazartý jumystarynyń sapasyna tekserý júrgizdi.
Tekserý barysynda «Arqarly aýylyna kirer jol» jáne «Enbekshi aýylyna kirer jol» jergilikti mańyzdaǵy avtojoldary tıisti deńgeıde tazartylmaǵany anyqtaldy. Olardy kútip ustaýǵa jaýapty «Alakóljoldary» JShS-ǵa QR ÁQBK-niń 631-baby boıynsha ákimshilik hattama toltyryldy. Sondaı-aq kompanııaǵa anyqtalǵan kemshilikterdi joıý týraly uıǵarym joldandy.
Bıylǵy jyl basynan Alakól APB Ákimshilik polıtsııa bóliminiń qyzmetkerleri jol jóndeý jáne joldardy kútip ustaýǵa jaýapty mekemelerge anyqtalǵan kemshilikterdi joıýǵa qatysty 93 uıǵarym joldaǵan. Aýdan aýmaǵyndaǵy kóshe jol jelileri men avtomobıl joldaryn kútip ustaý talaptaryn jáne jol júrisi qaýipsizdigin qamtamasyz etý qaǵıdalarynda belgilengen ózge de talaptardy oryndamaǵandary úshin 6 jol mekemesi ákimshilik jaýapkershilikke tartylǵan.
Óz kezeginde, tártip saqshylary júrgizýshilerdi joldyń qaýipsizdigi úshin jyldamdyq rejımin jáne joldaǵy qaýipsizdik talaptaryn qatań saqtaýǵa shaqyrdy. Óıtkeni, qysqy joldaǵy eleýsiz qatelik orny tolmas qaıǵyǵa ákelýi múmkin.
Esterińizge sala keteıik, Almaty oblysynda avtojolǵa tazartý jumystaryn durys júrgizbegen uıymǵa 83 myń teńge aıyppul salynǵan edi.
