Almaty oblysynda jolaýshy avtobýsynan 3,5 myń ondatr terisi tárkilendi
TALDYQORǴAN. QazAqparat - Almaty oblysynyń tártip saqshylary baǵaly ań terisiniń asa iri partııasyn tárkiledi, dep habarlaıdy QazAqparat tilshisi.
Zańsyz júk Jambyl aýdanyndaǵy polıtsııa beketinde toqtatylǵan «Setra» avtobýsynyń júk salǵyshynan tabyldy. Jolaýshylar avtobýsy Túrkistan oblysynan Almaty qalasyna bet alǵan. Júrgizýshiniń aıtýynsha, baǵaly teriler salynǵan «qundy» sálemdemeni Almatydan kútip alý tıis bolǵan.
«Bes úlken jol dorba tárkilendi. Olardyń ishinde ondatrdyń 3,5 myń terisi bolǵany anyqtaldy. Avtobýs júrgizýshisinde terisi baǵaly ańdy atýǵa, tasymaldaýǵa nemese satýǵa ruqsat etilgen qujaty joq. Ol tek teriler salynǵan sómkelerdi Almatydaǵy belgisiz adresatqa jetkizýdi suraǵanyn aıtty. Bul derek boıynsha sotqa deıingi tergeý amaldary júrgizilýde, is Jambyl aýdanynyń óndirisinde. Memleketke keltirilgen materıaldyq shyǵyn eseptelýde», - dep atap ótti Almaty oblysy Polıtsııa departamentiniń baspasóz qyzmetinen.
Sonymen qatar, vedomstvo taratqan aqparatqa sáıkes terilerdiń birnesheýi saraptamaǵa jiberilgen. Osy saraptamanyń qorytyndysy boıynsha naqty protsessýaldyq sheshim qabyldanatyn bolady.
