Almaty oblysynda jol apatynan bes adam qaza tapty
TALDYQORǴAN. QazAqparat - Almaty oblysynda jol apatynan bes adam kóz jumdy. Oqıǵa Panfılov aýdanynda «Batys Eýropa - Batys Qytaı» tas jolynda bolǵan, dep habarlaıdy QazAqparat tilshisi.
Anyqtalǵandaı, qyrkúıektiń 18-nen 19-na qaraǵan túni «Range rover» avtokóligi jol boıyndaǵy túıeni qaǵyp, aýdarylyp qalǵan. Oqıǵa ornynda kólikti tizgindegen 43 jastaǵy almatylyq kelinshek jáne úsh jolaýshy kóz jumdy. Al taǵy bir jolaýshy aýrýhanada qaıtys boldy.
Qaıtys bolǵan bes adamnyń barlyǵy áıelder. Aıdarly aýyly mańynda bolǵan kólik apatynan túıe de ólgen. Biraq maldyń ıesi áli anyqtalýda.
Qazir atalǵan fakti boıynsha QR QK 345 baby boıynsha qylmystyq is qozǵaldy. Oblystyń polıtseıleri málim etkendeı, oqıǵa bolǵan tas joldyń qurylysy áli aıaqtalmaǵan. Sondyqtan bul aımaqpen júrýge bolmaıdy.
