Almaty oblysynda jol apatynan 6 adam kóz jumdy
TALDYQORǴAN.QazAqparat - Búgin túnde Almaty oblysynda eki jol-kólik apatynan 6 adam kóz jumdy, taǵy 9 adam túrli dene jaraqattarymen aýrýhanaǵa túsken. Onyń ishinde balalar da bar, dep habarlaıdy QazAqparat tilshisi Almaty oblystyq Іshki ister departamentiniń baspasóz qyzmetine silteme jasap.
Oqıǵa «Almaty-Óskemen» jáne «Qarǵaly-Myńbaev» tasjoldarynda bolǵan.
«Jol-kólik oqıǵasynyń biri «Almaty-Óskemen» respýblıkalyq tasjolynyń Kóksý aýdanyndaǵy Balpyq bı aýylynyń mańynda bolǵan. Ol jerde BMV-525 avtokóligi aýdaryldy. Sonyń saldarynan júrgizýshi men onyń eki jolaýshysy oqıǵa ornynda kóz jumdy. Taǵy eki jolaýshy men bir bala aýrýhanaǵa jatqyzyldy. Jol apatynyń sebebi tergeý barysynda anyqtalady. Qajetti saraptamalar taǵaıyndalǵan»,-dep málimdedi Almaty oblysy PD baspasóz qyzmeti.
Osyǵan uqsas jol-kólik oqıǵasy búgin túnde Jambyl aýdanynyń Qarǵaly aýylynyń mańynda boldy. Ol jerde «San-Iong» jáne «Aýdı-100» avtokólikteri soqtyǵysqan. Jantúrshigerlik kólik apatynan 3 adam kóz jumdy. Taǵy alty adam túrli dene jaraqatymen aýrýhanaǵa jetkizilgen, onyń ekeýi bala.
«Osy fakti boıynsha qajetti saraptamalar taǵaıyndalyp, sotqa deıingi tergeý júrgizilýde. Tergeý jumystaryn oblystyq polıtsııa departamentiniń anyqtaýshylaryna júrgizý tapsyryldy»,-dep tolyqtyrdy baspasóz qyzmeti.
Polıtsııa qabyldaǵan sharalarǵa qaramastan sońǵy aıda óńirdiń avtojoldarynda 100-ge jýyq kólik apaty tirkelgen. Onda 40-tan astam adam qaza taýyp, 140-tan astam azamat jaraqat aldy. Jol apattarynyń negizgi sebepteri burynǵysynsha jyldamdyq rejımin saqtamaý, qarama-qarsy jolǵa shyǵý, sondaı-aq jaıaý júrginshilerdiń jol júrý erejelerin saqtamaýy deıdi.
