Almaty oblysynda jol apatyna ushyraǵan kólikte ákimdik qyzmetkerleri bolǵan
TALDYQORǴAN. QazAqparat - Almaty oblysyndaǵy Kegen-Narynqol tas jolynda jantúrshigerlik kólik apatyna ushyraǵandardyń ishinde ákimdik qyzmetkerleri bolǵan. Qazir Raıymbek aýdandyq bilim bóliminiń úsh mamany aýrýhanada jatyr, dep habarlaıdy QazAqparat tilshisi.
«Raıymbek aýdanynyń bilim bóliminde jumys isteıtin úsh adam kólik apatyna ushyrap, aýrýhanaǵa tústi. Qabyrǵasy synyp, basynan jaraqat alǵan 46 jastaǵy bas esepshi jansaqtaý bóliminde jatyr. Al aıaǵy synǵan 29 jastaǵy maman men 31 jastaǵy áıel jalpy palataǵa ornalastyryldy. Bul mamandar aýdan bólinbeı turǵan kezde Kegen aýylynda otyrǵan. Qazir olardyń jumys orny Narynqolda. Sol kúni olar Kegennen qujattaryn, zattaryn jınaqtap Narynqolǵa kele jatqanda, kólik apatyna ushyraǵan», - dep málim etti Raıymbek aýdany ákimdiginiń baspasóz hatshysy Aqnur Aýǵanbaı.
Mamannyń aıtýynsha, ákimdik qyzmetkerleri jol apatyna jekemenshik kólikpen ushyraǵan.
Esterińizge sala keteıik, biz buǵan deıin Kegen-Narynqol tas jolynda jantúrshigerlik kólik apaty saldarynan 5 adam mert bolyp, 7 adamnyń aýrýhanaǵa túskenin habarlaǵan bolatynbyz.
