Almaty oblysynda joǵary oqý oryndarynyń jalpy bilim beretin mektepterge qamqorlyǵy máselesi talqylandy
LMATY OBLYSY. Shildeniń 2-si. QazAqparat - Búgin Qazaqstan Respýblıkasy Bilim jáne ǵylym mınıstri Janseıit Túımebaev Elbasy Nursultan Ábishuly Nazarbaev oqyǵan Qarasaı batyr atyndaǵy mektep-gımnazııa, Abaı atyndaǵy mektep jáne Shamalǵan aýylyndaǵy mektep-gımnazııa ujymdarymen kezdesti, dep habarlaıdy Qazaqstan Respýblıkasy Bilim jáne ǵylym mınıstrliginiń baspasóz qyzmeti.
Kezdesýdiń negizgi maqsaty - Elbasynyń tapsyrmalaryna sáıkes respýblıka joǵarǵy oqý oryndarynyń jalpy bilim beretin mektepterge qamqorlyǵy aıasyndaǵy máselelerdiń baǵyt-baǵdaryn aıqyndaý.
«Nursultan Ábishuly Nazarbaevtyń bastamasymen júzege asyp jatqan birneshe jobalar men baǵdarlamalardy, máselen «100 mektep, 100 aýrýhana», Prezıdenttiń «Bolashaq» halyqaralyq stıpendııasy, daryndy balalarǵa arnalǵan «Daryn» oqý júıesi, Nazarbaevtyń ıntellektýaldy mektepteri, «Balapan» memlekettik baǵdarlamasy tárizdi basqa da jobalardy atap aıtsaq bolady, - dedi mınıstr. - Al Prezıdentimiz kúndelikti jumys barysynda qanshama ıgi ister atqaryp jatyr. Tek sońǵy jyldardyń ózinde ǵana Elbasynyń bastamasymen halyqaralyq deńgeıdegi birneshe ulttyq zerthanalar jabdyqtaldy, postkeńestik keńistikte teńdesi joq Nazarbaev ýnıversıteti ashyldy».
Táýelsiz Qazaqstannyń gúldenýi men ekonomıkasynyń turaqty damýy jolyndaǵy Elbasynyń eren eńbegi týraly onyń jerlesteri - qarapaıym dıqandar men malshylar, aýyl muǵalimderi men dárigerleri de maqtanyshpen atap aıtty.
J.Túımebaevtyń Abaı atyndaǵy QazUPÝ, Q.Sátbaev atyndaǵy QazUTÝ, Qazaq ulttyq agrarlyq ýnıversıteti tárizdi irgeli joǵary oqý oryndarynyń kezinde Elbasy oqyǵan mektepterdi qamqorlyqqa alǵany týraly sózderin aýyl turǵyndary aıryqsha qýanyshpen qabyldap, qoshemet kórsetti.
Mektepterge qamqorlyq jasaýda ýnıversıtetterdiń professorlary muǵalimderge ádistemelik kómek kórsetedi, stýdentter qazaqstandyq patrıotızmdi, salaýatty ómir salty men jastardy rýhanı-adamgershilik turǵyda tárbıeleý baǵytynda birlesken is-sharalar uıymdastyratyn bolady degen sóz.
Atalǵan joǵary oqý oryndary sonymen qatar ár mektepke bir-bir kompıýter synybyn jáne turmysy tómen otbasylarynan shyqqan mektep bitirýshiler úshin 10 oqý grantyn bólip otyr.
QR Bilim jáne ǵylym mınıstri Joǵary oqý oryndarynyń rektorlary men Qazaqstan kolledjderi dırektorlary keńesteriniń sheshimimen joǵary oqý oryndary men kolledjderine beriletin memlekettik granttarǵa qosymsha áleýmettik jaǵdaıy tómen otbasylardan shyqqan mektep bitirýshilerge, oralmandarǵa jáne shetelderde turatyn qandastarymyzǵa arnap 1000 grant taǵaıyndalǵanyn habarlady.
Qazaqstan Respýblıkasynyń Bilim jáne ǵylym mınıstrligi tárbıelik máni joǵary birqatar jalpyulttyq sharalar josparlap otyr. Atap aıtqanda, Astana kúni respýblıkanyń barlyq aımaqtarynda bir mezgilde barsha búldirshinderge arnalǵan «Merekelik otshashý» aktsııasy jáne «Astanaǵa gúl shoqtaryn tartý etemiz» atty respýblıkalyq shara uıymdastyrylyp otyr.
Qazaqstan Respýblıkasynyń Bilim jáne ǵylym mınıstri joǵaryda atalǵan mektepterdiń úzdik oqytýshylaryn Y.Altynsarın atyndaǵy tósbelgimen marapattap, Tuńǵysh Prezıdenttiń ustazy Seıithan Ahmetuly Isaevqa baǵaly syılyq tabys etti.
