Almaty oblysynda joǵalyp ketken oqýshy 45 kúnnen keıin tabyldy
«Almaty oblysynyń polıtseıleri eriktilermen birlesip Qaseıin Muraldy izdep tapty. Aıta ketý kerek, 14 jastaǵy jasóspirim 11 qyrkúıek kúni joǵalǵan jáne búgingi kúnge deıin onyń qaıda ekeni belgisiz bolǵan.
Jasóspirimdi izdeýge oblys polıtsııasynyń jeke quramy baǵyttaldy. Oblystyq Departament bastyǵynyń jeke baqylaýynda bolǵan izdeý is-sharalaryna eriktiler de qatysty» dep málimdedi Almaty oblystyq polıtsııa departamenti baspasóz qyzmetinen.
Vedomstvonyń aqparatyna sáıkes, oqýshy Talǵar aýdanynyń Saqtan kentinen tabyldy. Jasóspirimniń 40 kúnnen astam ýaqyt boıy ata-anasynan jasyrynǵany belgili boldy. Ol dalada ómir súrip, adamdardyń kózine túspeýge tyrysqan.
Qazirgi ýaqytta 14 jastaǵy bala úıine oraldy. Balanyń ákesi polıtseılerge jáne balany izdeýge kómektesken eriktilerdiń barlyǵyna úlken alǵysyn bildirdi.
«Kámeletke tolmaǵan jasóspirimniń úıden birinshi ret qashyp ketpegeni jáne ata-anasymen birge turýdan bas tartqany belgili boldy. Osyǵan baılanysty komıssııa quramynda oblystyq Qorǵanshylyq jáne qamqorshylyq bólimi, jergilikti atqarýshy organ qyzmetkerleri, ıývenaldy polıtsııa balanyń bolashaq taǵdyry týraly máseleni sheshedi»,- dep tolyqtyrdy atalǵan vedomstvonyń baspasóz qyzmetinen.