Almaty oblysynda joǵalyp ketken balanyń izdestirilip jatqanyna 4 kún boldy
ALMATY. QazAqparat - Almaty oblysynda taýda joǵalyp ketken búldirshinnniń izdestirilip jatqanyna 4 kún boldy. Oblystyq polıtsııa balanyń qasynda bolǵan ózge balalardan jaýap aldy, dep habarlaıdy QazAqparat tilshisi.
«Bala joǵalyp ketken soń, qasynda taýda bolǵan basqa balalardan suradyq. Olardyń aıtýynsha, taýǵa shyqqan kezinde olarǵa belgisiz er adam kelip, óziniń shopan ekenin, telefony joǵalyp ketkenin aıtqan. Telefonymdy sender aldyńdar dep kinálaǵan. 7 jastaǵy bala odan qorqyp basqa aýyl jaqqa qaraı qasha jónelgen», - dedi oblystyq ІІD baspasóz qyzmetinen.
Sodan beri Ernur Sádýaqas úıine oralmady.
Alǵashqy úsh kúnde balany izdestirýge 108 adam, 9 tehnıka jumyldyryldy.
«Búginde balany izdestirýdi AІІB, TJB qyzmetkerlerimen qatar jergilikti turǵyndar da, barlyǵy 59 adam kiristi. Taý-tas, saıajaı eldi mekenderdi, quz-jartastardy atpen, kólikpen, jaıaý aralap shyqtyq. Shóptiń qalyńdyǵy tolassyz jaýǵan jaýyn ıisshil ıtterge de jumys istetpeı jatyr», - dedi QR ІІM TJK resmı ókili Rýslan Imanqulov.
Aıta ketý kerek, Almaty oblysynyń Jambyl aýdanynda joǵalyp ketken balany qutqarýshylar 14 shildeden beri izdestirýde.
2011 jyly týǵan Ernur Sádýaqas Yntymaq aýylynan ońtústik qaptaldaǵy «Kishi saz» jaıylymyna bara jatqan joldaý taýly aýmaqta joǵalǵan.
7 jastaǵy Ernurmen birge úlkendi-kishili 5 bala jolǵa shyqqan. Qazir balalardyń barlyǵy aýylda. Tek Ernur ǵana oralmady.
