Almaty oblysynda joǵalyp ketken 6 jasar bala aman-esen tabyldy
TALDYQORǴAN. QazAqparat - Almaty oblysynyń qutqarýshylary iz-túzsiz joǵalǵan 6 jasar balany tapty, dep habarlaıdy QazAqparat tilshisi Tótenshe jaǵdaılar departamentiniń baspasóz qyzmetine silteme jasap.
«6 maýsym kúni keshki saǵat 22-lerde Almaty oblysynyń Tótenshe jaǵdaılar departamentine Aqsý aýdany Aqtoǵan aýylynyń mańynda 6 jastaǵy balanyń joǵalǵany týraly habar kelip tústi. 22 saǵat 15 mınýtta oqıǵa ornyna Aqsý aýdany tótenshe jaǵdaılar bóliminiń qutqarýshylarynan turatyn jedel top jiberildi. Ákesiniń sózine qaraǵanda, bala 6 maýsym kúni keshqurym sharýa qojalyǵynyń ýchaskesinde oınap júrgen. Al qarańǵy túsisimen bala joǵalyp, olar taba almaǵan», - delingen baspasóz baıanynda.
Túngi izdeý jumystarynan nátıje bolmaǵandyqtan qosymsha kúsh tartylǵan.
«7 maýsym kúni tańǵy saǵat 6-lar shamasynda izdeýge jergilikti atqarýshy organ, AІІB men jergilikti turǵyndardan turatyn 84 adam jumyldy. Qutqarýshylardyń jedel toby 10 saǵat 20 mınýt ótkende balany oqıǵa ornynan 15 shaqyrym qashyqta qalyń shalǵynnyń arasynan aman-esen tapty», - dep habarlady baspasóz qyzmeti.
