Almaty oblysynda joǵalǵan jasóspirim 5 kúnnen beri izdestirilýde
ALMATY. QazAqparat - Almaty oblysynda joǵalǵan 16 jasar Amırjan Kýchakovty týystary 5 kúnnen beri izdep jatyr, dep habarlaıdy QazAqparat tilshisi.
2002 jyly týǵan Amırjan Kýchakov 24 maýsymda kúndizgi saǵat 2-de Maqtaral aýdany Jetisaı qalasynan Qaskeleńge qaraı avtobýsqa minip ketken. Almaty oblysy Besaǵash aýdanyndaǵy týystaryna qydyryp barmaq bolǵan jigit sol kúıi habarsyz ketken. Bir kún ótken soń týystary Amırjandy izdeý úshin Jetisaıdan Qaskeleńge kelgen.
«Amırjan Qaskeleńnen túsetin avtobýs aıaldamasyna keldim. Osy jerde kópirdiń qasyndaǵy taksı júrgizýshilerine Amırjannyń sýretin kórsetip, ol jaıly surastyrdym. Olar maǵan sýrettegi adamnyń 25 maýsym kúni tańǵy 7-de tańerteń avtobýstan túsip, taksıge mingenin kórgenderin aıtty. Avtokólik markasy Daewoo Nexia bolýy múmkin. Ǵalamtorda «VK» áleýmettik jelisinde 26 maýsym kúni sońǵy ret saǵat keshki 8-de otyrǵanyn kórip otyrmyz. Qazir telefony óshirýli. Qarasaı aýdandyq ІІB-ge aryz jazdyq, izdep jatyrmyz deıdi. Ázirge basqa aqparat joq», - dedi aǵasy Sattar Toqsaev.
Amırjan Kýchakov boıy 1,50 sm, qara shashty, qońyr kózdi jigit. Sońǵy ret úıden ústine qara fýtbolka, qara djıns, aıaǵyna qara krossovka kıip, qyzyl rıýkzak asynyp shyqqan, qolynda paketi bolǵan.
Kórgen bilgender bolsa týystary +77475654988 (Sattar) nómirine nemese «102-ge» habarlasýyn suraıdy.
Bul aqparat boıynsha Almaty oblystyq ІІD baspasóz qyzmeti túsinikteme bermedi.
Atalǵan derekke baılanysty quqyq qorǵaý oryndarynan túsinikteme alýǵa tyrystyq. «Qarasaı aýdandyq ІІB-de 16 jastaǵy jasóspirim Amırjan Kýchakovtyń joǵalǵany týraly fakt tirkelgen. Onyń ákesi 28 maýsym kúni saǵat 23.30-da balasynyń 25 maýsym kúni joǵalǵany týraly aryz jazǵan. Qazirgi kezde jedel-izdestirý sharalary júrgizilýde», - dedi Almaty oblysy ІІD baspasóz qyzmetinen.
