Almaty oblysynda joǵalǵan oqýshy qyz oıyn-saýyq ortalyǵynan tabyldy
TALDYQORǴAN. QazAqparat - Almaty oblysynda 17 kún buryn joǵalǵan oqýshy qyz oıyn-saýyq ortalyǵynan tabyldy, dep habarlaıdy QazAqparat tilshisi.
Almaty oblystyq ІІD baspasóz qyzmetiniń málimetinshe, 14 qarasha kúni Eskeldi aýdandyq ІІB-ge Baqtybaı aýylynyń erli-zaıypty turǵyndary júginip, 14 jastaǵy qyzdarynyń joǵalyp ketkenin málim etken. Mán-jaıdy anyqtaı kele, polıtseıler qyzdyń Taldyqorǵan qalasynda 12 qarasha kúni joǵalǵanyn anyqtady. Sol kúni oqýshy ata-anasymen qalaǵa baryp, iz-túzsiz ketken. Anyqtalǵandaı, qyz balanyń qańǵybastyqqa beıim ekeni de belgili boldy. Úıinen qashyp ketýdi ádetke aınaldyrǵanynan mektep muǵalimderi de habardar eken. Osyǵan baılanysty Eskeldi aýdanynyń polıtseıleri Taldyqorǵandaǵy áriptesterimen birigip, izdestirý sharasyn uıymdastyrdy. Nátıjesinde joǵalǵan qyz 28-nen 29-na qaraǵan túni Taldyqorǵandaǵy oıyn-saýyq ortalyǵynyń birinen tabyldy.
«Oqýshynyń aıtýynsha, ol osy ýaqyt aralyǵynda óziniń jaqyn qurbylarynyń úıinde túnegen jáne jaqyn arada úıine qaıtýdy josparlamaǵan. Qyzdy Eskeldi aýdandyq ІІB-ge polıtseıler jetkizdi», dep málim etti oblystyq ІІD baspasóz qyzmeti.
Polıtsııa ókilderi qyzben taǵy bir márte profılaktıkalyq túsindirme jumystaryn júrgizdi. Artynsha balany ata-anasy úılerine alyp ketti.
