Almaty oblysynda joǵalǵan oqýshy qyz 11 kúnnen keıin tabyldy
TALDYQORǴAN. QazAqparat - Almaty oblysynda joǵalǵan oqýshy qyz 11 kúnnen keıin qalaaralyq avtobýs ishinen tabyldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, Qarasaı aýdanynyń 15 jastaǵy turǵyny iz-túzsiz joǵalyp ketken.
«24 qyrkúıek kúni saǵat 19:20 shamasynda Qarasaı aýdandyq polıtsııa bólimshesine 15 jastaǵy qyzdyń joǵalǵandyǵy jóninde habarlama tústi. 51 jastaǵy Jibek joly aýylynyń turǵyny qyzynyń eki kún buryn ıaǵnı, 22 qyrkúıek kúni túngi saǵat 21:00 shamasynda úıinen shyǵyp, sol kúıi habarsyz ketkenin jetkizdi. Balasyn ata-anasy izdegen. Biraq tappaǵan. Eki kúnnen keıin ǵana anasy polıtsııaǵa habar bergen», - delingen vedomstvonyń taratqan habarlamasynda.
Qarasaı aýdanynyń polıtseıleri úıinen qashyp ketken oqýshy qyzdy Qaskeleńnen Almatyǵa baǵyt alǵan avtobýstan tapty.
«Oqýshynyń sózinshe, ol úıinen ketken sátten bastap bazarda túnegen. Túsindirý jumystarynan keıin 15 jastaǵy qyz ata-anasynyń qolyna berildi»,- dep tolyqtyrdy atalǵan vedomstvonyń baspasóz qyzmetinen.
