Almaty oblysynda joǵalǵan 700-ge jýyq mal ıesine qaıtaryldy

TALDYQORǴAN. QazAqparat – Almaty oblysynyń aýmaǵynda jyl basynan beri mal urlyǵyn kásip qylǵan 59 qylmystyq toptyń músheleri quryqtaldy. Polıtseıler bultartpas aıǵaqtar arqyly olardyń 130-dan astam mal urlyǵyna qatysy baryn dáleldedi, dep habarlaıdy QazAqparat tilshisi.

Polıtsııa taratqan aqparatqa sáıkes, bıyl oblysta maldyń qoldy bolý deregi byltyrǵy jylmen salystyrǵanda 20 paıyzǵa azaıǵan. Sebebi, oblys aýmaǵynda tártip saqshylary usynǵan «Malshy – mal ıesi – atqarýshy organ» atty áleýmettik jobasy óz nátıjesin berýde. Atalǵan jobanyń basty maqsaty – mal ıesi men malshynyń jaýapkershiligin arttyrý jáne barymtashylar úshin ońaı olja bolatyn qaraýsyz maldy baqtashysyz qaldyrmaý. Osy kezge deıin oblysta bes myńǵa jýyq adam baǵdarlama boıynsha kelisimge kelip, óz múlkiniń amandyǵyn qamtamasyz etti.

«Malshy – mal ıesi – atqarýshy organ» baǵdarlamasy qabyldanǵaly jaıylymdaǵy maldyń joǵalý deregi edáýir azaıdy. Salystyrmaly túrde, 2017 jyly 460-qa jýyq derek tirkelse, bıyl jaıylymnan joǵalǵan mal boıynsha 148 fakti oryn aldy. Atalǵan qylmystarǵa qatysy bar tulǵalardy anyqtaý boıynsha keń aýqymdy jumystar atqarylýda»,- dep atap ótti oblystyq PD Krımınaldyq polıtsııa basqarmasynyń bastyǵy Erǵalı Ábilǵazıev.

Aıta keteıik, aýyl sharýashylyǵy óristep damyǵan oblysta bıyl tártip saqshylary 700-ge jýyq qoldy bolǵan maldy ıelerine qaıtaryp, 80 mıllıon teńgege jýyq materıaldyq shyǵyn óndirilgen.