Almaty oblysynda jiti ishek ınfektsııasynyń 360 jaǵdaıy tirkeldi
Oblystyq sanıtarlyq-epıdemıologııalyq baqylaý departamentiniń málimetinshe, ishek ınfektsııasy kóbine 14 jasqa deıingi balalar arasynda tirkelip otyr. Jarty jyl ishinde óńirde 360 adam jiti ishek ınfektsııasymen aýyrdy, onyń 256-sy bala.
Infektsııa taralýynyń negizgi faktorlary - úıde daıyndalǵan taǵamdar, jýylmaǵan jemister men kókónister, sút jáne tez buzylatyn ónimder. Paıyzdyq kórsetkishpen aıtqanda, úıde daıyndalǵan ónimderdiń úlesine - 96,1%, jýylmaǵan kókónister men jemisterge - 1,3%, sút ónimderine - 0,3%, túrli konservilerge - 2,3% kelip otyr.
«Sonymen qatar, kóptegen adamdar ishek ınfektsııalarynyń qozdyrǵyshtary tózimdi jáne topyraqta, sýda, sondaı-aq ydys-aıaq, esik tutqalary, oıynshyqtar sııaqty ártúrli qoldanystaǵy zattarda uzaq saqtalatynyn umytyp ketedi. Odan bólek, mıkrobtar belgili bir temperatýra jaǵdaıynda sýda, sút jáne sút ónimderinde, tartylǵan et, kondıterlik ónimder, salattar jáne basqa da tez buzylatyn azyq-túlikterde jaqsy kóbeıedi»,- dep habarlady departamentten.
Sonymen qatar, mamandar ishek ınfektsııasynyń belgileri baıqalsa dereý dárigerge qaralýǵa keńes berdi.
«Іshtiń aýyrýy, qusý, dıareıa, dene qyzýy kóterilse, jalpy álsizdik, tábettiń tómendeýi baıqalsa birden dárigerdiń kómegine júgingen abzal. Ózin-ózi emdeýge bolmaıdy, óıtkeni onyń zardaby odan da aýyr bolýy múmkin. Mysalǵa, júrek aınyǵanda jáne dıareıa kezinde adam aǵzasyndaǵy suıyqtyq joǵalady, aǵzadaǵy sý almasýy buzylyp, odan ári júrek - qan tamyrlary, búırek jáne basqa organdardyń aýrýyna ákeledi»,- dep atap ótti vedomstvadan.