Almaty oblysynda Jetisý dástúrli án ortalyǵy ashyldy

TALDYQORǴAN. QazAqparat - Almaty oblystyq Súıinbaı atyndaǵy fılarmonııa janynan «Mıras» dástúrli án ortalyǵy quryldy. Ortalyq aıasynda jetisýlyq ánshiler dástúrli án ónerin nasıhattaıdy, dep habarlaıdy QazAqparat tilshisi.

Jańa ortalyq qoǵamdyq birlestik negizinde jumys isteıdi. Uıymǵa Súıinbaı atyndaǵy oblystyq fılarmonııada óner kórsetip júrgen kópshilikke tanymal dástúrli ánshiler Erlan Jebegenov, Saıa Esengeldınova, Quralaı Shaıahmetova, Kenjekeı Aqjolova jetekshilik etedi.

«Ázirge ortalyqqa 20 ónerpaz múshe bolyp otyr. Aldaǵy ýaqytta elimizdiń basqa óńirleriniń dástúrli ánshilerimen baılanysqa shyǵyp, qatarǵa qosqymyz keledi», - deıdi qoǵamdyq uıym tóraǵasy, halyqaralyq jáne respýblıkalyq baıqaýlardyń laýreaty Erlan Jebegenov.

Sondaı-aq ortalyqtyń kórkemdik keńesi qurylyp, ol jerge dástúrli án ónerinde ózindik orny bar, tájirbıeli aǵa býyn ókilderi shaqyryldy.

Oblystyq mádenıet, arhıvter jáne qujattama basqarmasynyń basshysy Márlen Kólbaevtyń aıtýynsha, bul uıym Jetisý jeriniń dástúrli án mektebin qalyptastyryp, qalyń buqaraǵa nasıhattap dáripteýdi maqsat etpek.

«Sondaı-aq ortalyq músheleri balalar arasynda dástúrli án, jyr-termeni damytý baǵytynda úıirmeler ashyp, óner mektepterinde sheberlik sabaqtaryn ótkizedi», - deıdi basqarma basshysy.

Ortalyqtyń taǵy bir maqsaty dástúrli án ónerin, termeleri men jyrlaryn dáriptep kelgen tarıhı tulǵalardyń, aqyn-jyraý, ánshi-termeshi esimderin jańǵyrtyp, olardyń oryndaǵan tól týyndylaryn jınaqtap, kitap etip shyǵarý.