Almaty oblysynda jetimnen tartyp alynǵan úıdi prokýrorlar qaıtaryp berdi

TALDYQORǴAN.QazAqparat -  Almaty oblysyna qarasty Eskeldi aýdanynyń turǵyny 2009 jyly qaıtys bolyp, onyń kámeletke tolmaǵan tórt balasy jaqyn týysqanyna qomqorshylyqqa berilgen. Alaıda qamqorshy ana balalarǵa memleket tarapynan berilgen páterdi de, járdemaqyny da maqsatsyz paıdalanǵanyn oblystyń prokýrorlary anyqtady, -  dep habarlaıdy QazAqparat tilshisi.

Osyǵan oraı, jetim balalardyń ishinen kámeletke tolǵan úlkeni Quqyq qorǵaý qyzmetteri ortalyǵyna kómek surap keldi. Shaǵymdanýshynyń sózinshe,  2015 jyly jergilikti atqarýshy organmen memlekettik turǵyn-úı qorynan jetim balalarǵa páter berilgen.

«Alaıda, qamqorlyqqa alynǵan balalardyń múliktik quqyqtaryn buza otyryp, qamqorshy osy páterge óziniń qyzyn kirgizgen. Al jetim balalardy asyraýǵa jáne turýǵa qalypty jaǵdaıy joq óziniń úıine ornalastyrǵan. Prokýrorlarmen ótinish berýshiniń ýájderi muqııat qaraldy. Sondaı-aq qorǵanshylyq jáne qamqorshylyq organdarymen birlesip, qanaǵattanarlyqsyz dep tanylǵan otbasylardyń turǵyn-úı turmystyq jaǵdaılaryna tekseris júrgizildi. Balalardy asyraýǵa aı saıyn memleketten berilip otyrǵan járdemaqyny qamqorshy maqsatsyz paıdalanǵany anyqtaldy»,  - dep málimdedi Almaty oblysy prokýratýrasynyń baspasóz qyzmeti.

 Qabyldanǵan sharalardyń nátıjesinde jetim balalar memleketten berilgen  páterge oraldy. Al jaqyn týys bolyp kelgen  qamqorshy mindetterin oryndaýdan bosatylyp, balalar kámeletke tolǵan ápkeleriniń qamqoryna berildi.

Aıta keteıik, oblys prokýratýrasynyń Quqyq qorǵaý qyzmetteri ortalyǵyna kómek surap keletin  azamattardyń qatary artyp keledi. Máselen, bıyl osy ortalyqqa  2,7 myńnan astam azamat ótinish bildirgen.