Almaty oblysynda jer qatynastary boıynsha 11 qyzmetkerge qylmystyq is qozǵaldy

TALDYQORǴAN. QazAqparat - Almaty oblysynda tek osy jyldyń birinshi toqsanynda jer qatynastary salasynda 11 qylmystyq is qozǵalǵan. Olardyń 9 deregi sybaılas jemqorlyq boıynsha qaralǵan, dep habarlaıdy QazAqparat tilshisi.

Óńirde dál osy jer máselesimen 2018 jyly 29 quqyqbuzýshylyq tirkelse, 2019 jyly 7 is qozǵalǵan. Sottalǵandardyń basym bóligi Almaty megapolısi mańyndaǵy aýyl ákimderi, jer bóliminiń mamandary.

Qazaqstan Respýblıkasy Sybaılas jemqorlyqqa qarsy is-qımyl agenttiginiń Almaty oblysy boıynsha departamenti jer qatynastary salasyna monıtorıng júrgizip, birqatar zańbuzýshylyqtardy anyqtaǵan. Zertteý nátıjeleri boıynsha óńir sybaılas jemqorlyqqa qarsy antıreıtıng tiziminde kósh bastap tur. Jer tóńiregindegi daýlardy boldyrmaý, ashyqtyqty qamtamasyz etý maqsatynda budan bylaı jer komıssııasynyń otyrystaryn jarııaly túrde ótkizý usynylýda. Aldaǵy ýaqytta ár basqosýda aýdıo-beıne jazba júrgizilip, azamattyq qoǵam ókilderi men buqaralyq aqparat quraldary da qatysatyn bolady.

«Zańnyń barlyq tıisti baptary jumys isteý kerek. Jáne bizdiń halyqqa óz tarapymyzdan, memlekettik qyzmetshiler tarapynan tıisti jaǵdaı jasaýymyz kerek. Jerdiń bólinýine de, onyń maqsatynyń zańdy aýysýyna monıtorıng júrgiziledi», - dedi Departament basshysynyń birinshi orynbasary Jandos Jumabaev.