Almaty oblysynda «jeńgetaılar» ustaldy
TALDYQORǴAN. QazAqparat - Almaty oblysynda stop-trafık arnaıy is-shara barysynda jeńil júristi áıelderge «jeńgetaılyq» kómek kórsetken eki azamatsha ustaldy. Kúdiktilerdi polıtseıler qolǵa túsirdi, dep habarlaıdy QazAqparat tilshisi.
Zańsyz áreketke barǵan Taldyqorǵan qalasyndaǵy qonaq úıdiń ákimshisi men Qarasaı aýdanyndaǵy saýna ákimshisine qylmystyq is qozǵaldy.
«Arnaıy is-shara barysynda 50 jáne 38 jastaǵy eki azamatsha adam saýdasyna qatysy bar degen kúdikke ilindi. Qazirgi ýaqytta sotqa deıingi tergeý amaldary júrgizilýde. Sondaı-aq, «jeńil júriske» túsken Qyrǵyzstan azamatshasyn Qazaqstan Respýblıkasynyń aýmaǵynda júrý erejesin buzǵany jáne quqyq buzýshylyq jasaǵany úshin ákimshilik jaýapkershilikke tartý jáne el aýmaǵynan shyǵarý máselesi qarastyrylýda. Shetel azamatshasy tıisti mekemege ornalastyryldy»,- dep habarlaıdy Almaty oblysy PD baspasóz qyzmeti.
Óz kezeginde tártip saqshylary adam saýdasy men olardyń quqyǵyn shekteýge qatysty zań buzýshylyqtarmen kúres únemi júretinin jetkizdi. Oblys turǵyndaryn kez-kelgen derek oryn alǵan jaǵdaıda polıtsııaǵa habar berýdi suraıdy.
