Almaty oblysynda jemqor qyzmetkeri úshin 4 basshy otstavkaǵa aryz bergen
Almaty oblysy boıynsha sybaılas jemqorlyqqa qarsy qyzmet basshylardyń óz qaramaǵyndaǵy qyzmetkerlerdiń sybaılas jemqorlyǵy úshin derbes jaýapkershiligi ınstıtýtynyń iske asyrylýyna monıtorıng júrgizip keledi.
Osy ınstıtýtty iske asyrýǵa monıtorıng júrgizilgen sátten bastap, oblysta óziniń qaramaǵyndaǵy qyzmetkerlerdiń sybaılas jemqorlyq qylmystary úshin 4 basshy (saıası memlekettik qyzmetshiler) otstavkaǵa ketý boıynsha aryz jazdy. Oblys basshylyǵy tek 1 basshynyń otstavkaǵa ketýin qabyldady (Tekeli qalasynyń eks-ákimi), qalǵan 3-eýi sógis jáne qyzmetine tolyq sáıkes emestigi týraly eskertý túrinde tártiptik jaýapkershilikke tartyldy (Qarasaı, Kerbulaq, Panfılov aýdandarynyń ákimderi).
Sonymen qatar, sybaılas jemqorlyqtyń dáleldengen faktileri úshin 14 basshy (ákimshilik memlekettik qyzmetshiler) tártiptik jaýapkershilikke tartyldy. Onyń ishinde: eskertý alǵandar – 2, sógis alǵandar – 4, qatań sógis alǵandar – 5, atqaryp otyrǵan laýazymynan bosatylǵandar – 2, laýazymyn tómendetý – 1.
«Qatań sógis» alǵandardyń arasynda Qarasaı aýdany Jibek joly kentiniń aýyldyq okrýginiń ákimi, Qapshaǵaı qalasy boıynsha Memlekettik kirister basqarmasynyń basshysy, Raıymbek aýyldyq okrýginiń ákimi, Panfılov aýdanynyń aýyl sharýashylyǵy bóliminiń basshysy.
«Sógis» túrinde tártiptik jazaǵa «QTJ-Júk tasymaly» AQ MK Almaty bólimshesi fılıalynyń dırektory, «QR AShM Agroónerkásiptik keshendegi memlekettik ınspektsııa komıtetiniń Almaty oblystyq aýmaqtyq ınspektsııasy» RMM basshysy, Tekeli qalasynyń halyqty jumyspen qamtý ortalyǵynyń basshysy tartyldy.
Sonymen qatar, birqatar memlekettik qyzmetshige qatysty qylmystyq ister sotqa deıingi tergeý jáne sot talqylaýy satysynda tur.
Solar qylmystyq jaýapkershilikke tartylǵan jaǵdaıda, saıası memlekettik qyzmettegi basshylar otstavkaǵa ketý boıynsha aryz jazyp, al ákimshilik memlekettik qyzmetkerler baǵynyshtylary sottalǵan jaǵdaıda tártiptik jaýapkershilikke tartylady.
Eske salaıyq, 2020 jyly Qazaqstanda otstavkaǵa ketý jáne birinshi basshylardyń qaramaǵyndaǵy qyzmetkerlerdiń sybaılas jemqorlyq úshin derbes jaýapkershiligi ınstıtýty jumys isteı bastady. Zańnamalyq normaǵa sáıkes, memlekettik saıası qyzmetshiler – mınıstrler jáne olardyń orynbasarlary, oblystardyń, Nur-Sultan, Almaty, Shymkent qalalarynyń ákimderi men ákimder orynbasarlary, aýdandardyń ákimderi ózderine tikeleı baǵynysty qyzmetker jemqorlyq qylmysyn jasaǵan jaǵdaıda ornynan túsýge mindetti. Al saıası emes, A jáne B korpýsynyń memlekettik ákimshilik qyzmetshileri bolyp tabylatyn barlyq basqa basshylar tártiptik jaýapkershilikke tartylady.
