Almaty oblysynda jeke turǵyn úı órtenip, úsh adam qaıtys boldy
Almaty oblystyq tótenshe jaǵdaılar departamenti baspasóz qyzmetiniń málimetinshe, oqıǵa búgin túnde, saǵat on ekiler shamasynda bolǵan.
«Shaqyrtý ornyna jetkennen keıin 90 sharshy metr alańdaǵy jeke turǵyn úıdiń janyp jatqany anyqtaldy. Bul úıde 2021 jyldan beri 8 adam (otbasy) turǵan. Órt sóndirý kezinde 1960 jyly týǵan áıeldiń (áje), 2018 jáne 2019 jyly týǵan uldardyń (nemereler) deneleri tabyldy», - delingen vedomstvonyń habarlamasynda.
Otbasynyń qalǵan músheleri aýrýhanaǵa jetkizildi.
«Sondaı-aq, saǵat 1:30-da oqıǵa ornynan Esik qalasynyń aýrýhanasyna balalardyń 1999 jylǵy anasy, 1991 jylǵy ákesi, 1958 jylǵy atasy, 2022 jyly týǵan sábı jáne 2002 men 2004 jylǵy kórshileri jetkizilgen. Aldyn ala boljam boıynsha bul alty adamnyń barlyǵy ıis tıip ýlanǵan», - dep tolyqtyrdy vedomstvonyń baspasóz qyzmeti.
Almaty oblystyq densaýlyq saqtaý basqarmasynyń baspasóz qyzmeti naýqastardyń jaǵdaıy týraly málimet berdi.
«Órtten zardap shekken Kosmos aýylynyń 6 turǵyny aýrýhanaǵa túsken bolatyn. Dárigerler tekserý júrgizip, úılerine jiberdi. Barlyǵy ambýlatorııalyq jaǵdaıda em qabyldaıdy. 6 adamnyń da jaǵdaıy qanaǵattanarlyq», - dep habarlady baspasóz qyzmeti.
Aıta ketsek, qyzyl jalyn saǵat 1:03-te oqshaýlanyp, saǵat 01:15-te tolyqtaı sóndirilgen. Órt faktisi boıynsha qylmystyq is qozǵaldy.
«Ózge aqparat jarııa etilmeıdi. Órt sóndirýge TJD 7 qyzmetkeri men 2 tehnıkasy, PD 3 qyzmetkeri jáne 1 tehnıkasy, jedel medıtsınalyq járdem brıgadasynyń 2 qyzmetkeri men 1 tehnıkasy jumyldyryldy», - delingen Almaty oblysy TJD baspasóz qyzmetiniń habarlamasynda.
